جەلى جۇمىسىنىڭ بۇزىلۋىن كەيبىر ساراپشىلار مەكتەپتەردە حيدجاب كيۋگە قاتىستى جاڭا شەكتەۋلەرگە قارسى نارازىلىقپەن بايلانىستىرادى، دەپ حابارلايدى BBC.
باسىلىم مالىمەتىنشە، ەل تۇرعىندارى Instagram مەن TikTok-قا كىرۋدە جاپپاي قيىندىقتارعا تاپ بولعان. BBC ءتىلشىسى جۇرگىزگەن تەكسەرۋ بارىسىندا دا الەۋمەتتىك جەلىلەردىڭ قالىپتى جۇمىس ىستەمەيتىنى انىقتالعان. كەيبىر قولدانۋشىلار YouTube جۇمىسىنىڭ باياۋلاعانىن، Gmail پوشتاسىنا جانە ينتەرنەتكە قوسىلۋدا قيىندىقتار تۋىنداعانىن حابارلاعان.
ازەربايجان بيلىگى الەۋمەتتىك جەلىلەردىڭ بۇعاتتالعانىن رەسمي تۇردە راستاعان جوق جانە ولاردىڭ جۇمىسىنىڭ بۇزىلۋ سەبەپتەرىن تۇسىندىرمەدى.
دەگەنمەن بۇل جاعداي 21-قىركۇيەكتە قابىلدانعان مەكتەپ فورماسىنا قاتىستى ۇكىمەت قاۋلاسىنا بايلانىستى تۋىنداعان نارازىلىقپەن تۇسپا-تۇس كەلدى.
قۇجاتتا حيدجاب تۋرالى تىكەلەي ايتىلماعانىمەن، وقۋشىلار مەن مۇعالىمدەردىڭ كيىمى ءبىلىم بەرۋدىڭ زايىرلىلىق قاعيداتىنا سايكەس كەلۋى كەرەكتىگى كورسەتىلگەن. ءىس جۇزىندە بۇل تالاپ مەكتەپتەردە حيدجاب كيۋگە تىيىم سالۋ رەتىندە قولدانىلىپ جاتىر.
جاڭا تارتىپكە قارسى ءبىرقاتار مەكتەپتە نارازىلىق اكسيالارى وتكەن. ولارعا حيدجاب تاعاتىن قىزدارمەن قاتار باسقا وقۋشىلار، ونىڭ ىشىندە ۇل بالالار دا قاتىسقان.
الەۋمەتتىك جەلىلەردە تاراعان ۆيدەولاردىڭ بىرىندە وقۋشىلار «حيدجاب وقۋعا كەدەرگى ەمەس!» دەپ ۇرانداتقان.
ازەربايجان ىشكى ىستەر مينيسترلىگى مەكتەپ فورماسىنا قاتىستى تالاپتاردىڭ ورىندالۋىنا كەدەرگى كەلتىردى دەگەن كۇدىكپەن 37 ادامنىڭ ۇستالعانىن حابارلادى.
ۆەدومستۆو مالىمەتىنشە، ءبىر توپ ادام باكۋدەگى مەكتەپتەردە ءبىلىم بەرۋ قىزمەتكەرلەرىمەن جانجالداسىپ، مەملەكەتتىك ءبىلىم بەرۋ مەكەمەلەرىنە زالال كەلتىرگەن، قوعامدىق ءتارتىپتى بۇزىپ، كولىك قوزعالىسى مەن مەكتەپ جۇمىسىنا كەدەرگى جاساعان.
سونىمەن قاتار BBC ءدىڭ باكۋدەگى مەكتەپتەردىڭ بىرىندەگى دەرەككوزى جوعارى سىنىپ وقۋشىلارىنان ساقالدارىن قىرۋ تالاپ ەتىلگەنىن ايتقان. الايدا ۇكىمەت قاۋلىسىندا ساقالعا قاتىستى تالاپ جوق.
بۇل ماسەلە قوعامدا ءتۇرلى پىكىر تۋعىزدى. بيلىكتى سىناۋشىلار جاڭا شەكتەۋلەردى ءدىني سەنىم بوستاندىعىنا قىسىم دەپ باعالاسا، بيلىك ۇستانىمىن قولداۋشىلار ونى زايىرلى ءبىلىم بەرۋ جۇيەسىن قورعاۋ جانە سىرتقى ءدىني ىقپالدىڭ الدىن الۋ شاراسى دەپ ەسەپتەيدى.
«ءبىلىم جونىندەگى كەڭەس» قوعامدىق بىرلەستىگى حيدجاب ماسەلەسىن ساياسيلاندىرماۋعا شاقىردى. ۇيىمنىڭ پىكىرىنشە، ءدىني سەزىمدى ساياسي ماقساتتا پايدالانۋ قوعامداعى تۇراقتىلىققا، توزىمدىلىككە جانە ۇلتتىق-رۋحاني قۇندىلىقتارعا كەرى اسەر ەتەدى.
ساياسي شولۋشى فارحاد مامەدوۆ تە بالالاردىڭ سىرتقى ءدىني ىقپال قۇرالىنا اينالماۋى كەرەكتىگىن اتاپ ءوتتى.
ايتا كەتەيىك، ازەربايجاندا مەكتەپتە حيدجاب كيۋگە قاتىستى شەكتەۋلەر بۇعان دەيىن دە ەنگىزىلگەن. 2011-جىلى ءبىلىم مينيسترلىگىنىڭ وسىنداي شەشىمى باكۋ مەن نارداران ەلدى مەكەنىندە جاپپاي نارازىلىققا ۇلاسقان. ول كەزدە پوليتسيا شەرۋگە قاتىسۋشىلاردى ۇستاپ، كەيبىرى باس بوستاندىعىنان ايىرىلعان.
Datareportal مالىمەتىنشە، حالقى 10 ميلليوننان اساتىن ازەربايجاندا 9,27 ميلليون ينتەرنەت قولدانۋشىسى بار. Instagram اۋديتورياسى 4,25 ميلليون، TikTok قولدانۋشىلارى 7,61 ميلليون، ال Facebook اۋديتورياسى 1,65 ميلليون ادامعا جەتەدى.