Azerbaijan Airlines ۇشاعىنىڭ اپاتىن تەكسەرۋدىڭ ەكىنشى كەزەڭى اتقارىلىپ جاتىر - مينيستر
استانا. KAZINFORM - ق ر كولىك ءمينيسترى مارات قارابايەۆ اقتاۋ قالاسى ماڭىندا Azerbaijan Airlines ۇشاعىنىڭ اپاتقا ۇشىراۋى ءىسى بويىنشا تەكسەرۋ قاي كەزەڭدە ءجۇرىپ جاتقانىن ايتتى.
- قازاقستان تەرگەۋ امالدارىن جۇرگىزەتىن ەل رەتىندە بەكىتىلگەن. كەز كەلگەن تەرگەۋ بىرنەشە كەزەڭگە بولىنەدى. ءبىرىنشى كەزەڭ - ءتيىستى ماتەريالداردى جيناۋ، ياعني وسى كەزەڭ اياقتالدى. ەندى ەكىنشى كەزەڭ جالعاسىپ جاتىر. بۇل تۇرعىدا جيناقتالعان ماتەريالداردى زەرتتەۋ ءىس-شارالارى اتقارىلىپ وتىر. ونىڭ اياسىندا ءبىزدىڭ ماماندار جۇمىلدىرىلعان شەتەلدىك ماماندارمەن، سونىڭ ىشىندە يكاو وكىلدەرىمەن بىرگە باكۋ مەن گروزنىيدا، روستوۆتا بولدى، - دەدى م. قارابايەۆ سەناتتا جولداردىڭ ماسەلەسىن تالقىلاۋعا ارنالعان ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.
ەسكە سالساق، بىلتىر 25 -جەلتوقساندا اقتاۋ ماڭىندا، باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىراعان بولاتىن. بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالدى.
بيىل قاڭتار ايىندا ازەربايجاننىڭ باس پروكۋرورى كامران الييەۆ اقتاۋ ماڭىندا ازەربايجان اۋە كومپانياسى ۇشاعىنىڭ اپاتقا ۇشىراۋىنا قاتىستى قازاقستان مەن رەسەيدىڭ ءتيىستى قۇرىلىمدارى - پروكۋراتۋرا جانە قۇقىق قورعاۋ ورگاندارىمەن بىرلەسىپ تەرگەۋ جۇرگىزىپ جاتقانىن مالىمدەدى.