ازاماتتار «الەۋمەتتىك ءاميان» ەلەكتروندىق سەرۆيسى ارقىلى تەگىن ءدارى-دارمەك الا باستادى

استانا. KAZINFORM - بۇگىن استانا قالاسىنىڭ ەكى ەمحاناسىندا پاتسيەنتتەرگە QR- كود ارقىلى «الەۋمەتتىك ءاميان» بولىمىندە ( eGov Mobile قوسىمشاسى) تەگىن دارىلىك زاتتاردى بەرۋ مەحانيزمى كورسەتىلدى.

«الەۋمەتتىك ءاميان» ارقىلى ءدارى-دارمەكتەردى ەلەكتروندىق تۇردە بەرۋ جونىندەگى پيلوتتىق جوباعا ەل بويىنشا 700-دەن استام مەديتسينالىق ۇيىم قاتىسادى، 93 مىڭ رەتسەپت نەگىزىندە پرەپاراتتار بەرىلگەن.

№4 قالالىق ەمحانادا ون جىلدان بەرى ديسپانسەرلىك ەسەپتە «قانت ديابەتى» دياگنوزى قويىلعان پاتسيەنت تەك جەكە QR كودىن (ۆاۋچەر) كورسەتىپ، ءدارى-دارمەكتەرىن مەيىرگەردەن تىكەلەي الدى.

وسىلايشا، ەندى ازاماتقا قاعاز رەتسەپت الۋ ءۇشىن دارىگەرگە جازىلۋعا ۋاقىت جۇمساۋدىڭ قاجەتى جوق، مەيىرگەر كەزەكسىز قاجەتتى پرەپاراتتى ءوز بەتىنشە بەرە الادى.

ەگدە جاستاعى تۇرعىندار نەمەسە «الەۋمەتتىك ءاميان» مەملەكەتتىك سەرۆيسىنىڭ قىزمەتتەرىن پايدالانا المايتىن باسقا ادامدار ءۇشىن ەمحاناعا بارعان كەزدە Face-ID جانە ۆەب-كامەرالاردىڭ كومەگىمەن سايكەستەندىرۋدەن ءوتۋ جەتكىلىكتى، سودان كەيىن پاتسيەنتتىڭ قولىنا ءتيىستى دارىلىك زاتتار بەرىلەدى.

جىل سوڭىنا دەيىن بۇل جوبا تەگىن امبۋلاتوريالىق دارىلىك قامتاماسىز ەتۋ شەڭبەرىندە پرەپاراتتار الاتىن 1,7 ميلليون ادامدى قامتي وتىرىپ، بۇكىل رەسپۋبليكا بويىنشا كەڭەيتىلەتىن بولادى.

«الەۋمەتتىك ءامياندى» پايدالانۋ ازاماتتاردى دارىلىك زاتتارمەن قامتاماسىز ەتۋ، زاڭسىز اينالىمدى بولدىرماۋ، بۇرمالاۋ جانە باسقا دا بۇزۋشىلىقتار سالاسىندا قولجەتىمدىلىك پەن تولىق اشىقتىق ءۇشىن جاعداي جاسايدى.

«الەۋمەتتىك ءاميان» قىزمەتىن پايدالانۋ ءۇشىن App Store جانە Play Market دۇكەندەرىندە قولجەتىمدى eGov Mobile قوسىمشاسىن جۇكتەپ الۋ قاجەت.

ازامات دارىلىك زاتتاردى الۋ ءۇشىن eGov Mobile قوسىمشاسىندا تىركەۋدەن ءوتۋى نەمەسە تىركەۋ بۇرىن جۇرگىزىلگەن بولسا، سايكەستەندىرۋدەن ءوتۋى ءتيىس. ءارى قاراي، ازامات باستى بەتتە «الەۋمەتتىك ءاميان» بولىمىنە كىرىپ، «ءدارى-دارمەكپەن قامتاماسىز ەتۋ» جولىن تاڭدايدى.

اۆتور

اسحات رايقۇل