ازامات ساتىبالدى قازاق فيلم باسشىلىعىنان نەگە كەتكەنىن ايتتى

استانا. KAZINFORM - ازامات ساتىبالدى شاكەن ايمانوۆ اتىنداعى «قازاق فيلم» اكسيونەرلىك قوعامىنىڭ پرەزيدەنتتى قىزمەتىنەن نەگە كەتىپ جاتقانىن ايتتى.

«ءيا، ول راس اقپارات. ءدال قازىر قىتايدا ءجۇرمىن. وسىندا ءبىر جوباعا شاقىرتۋ العانمىن. وعان قاتىسۋ ءبىراز ۋاقىت الاتىن بولىپ تۇر. سول سەبەپتەن قازاق فيلمدەگى قىزمەتىمنەن كەتۋ جونىندە شەشىم قابىلدادىم. ال بۇل جاقتاعى جوبانىڭ ناقتى قانداي جوبا ەكەنىن ازىرگە ايتا المايمىن. ازىرگە كونفيدەنتسيالدى اقپارات. الداعى كۇندەرى ناقتى رەسمي اقپارات شىعادى. سول كەزدە بىلەسىزدەر»، - دەدى ول Kazinform تىلشىسىنە.

سونداي-اق، ول قازاق فيلم باسشىلىعىنان كەتۋىنە «قازاق انيماتسيا» شىعارماشىلىق بىرلەستىگىنىڭ جالاقى داۋىنىڭ قاتىسى جوق ەكەنىن ايتتى.

«ول داۋدىڭ بۇعان ەشقانداي قاتىسى جوق. ءوز ەركىممەن كەتىپ بارامىن»، - دەپ ناقتىلادى اكتەر.

ەسكە سالا كەتەيىك، بۇعان دەيىن «التىن ادام» تۋىندىسىنىڭ انيماتورلارى جەتى ايدان بەرى جالاقى الماعانىن ايتىپ، قازاق فيلم عيماراتىنىڭ الدىندا نارازىلىققا شىققان بولاتىن.

كەيىننەن قازاق فيلم انيماتورلاردىڭ قوردالانعان ايلىعىن تولەپ بەرەتىنىن مالىمدەدى.

اۆتور

ەسىمجان ناقتىباي