ازامات ءامرين كەلەر جىلى كىرىستەردىڭ نەگىزگى ءوسىم فاكتورلارىن اتادى

استانا. قازاقپارات - 2025 -جىلى رەسپۋبليكالىق بيۋدجەت كىرىستەرى 2,9 تريلليون تەڭگەگە ارتادى. بۇل تۋرالى ماجىلىستە ۇلتتىق ەكونوميكا ۆيتسە- ءمينيسترى ازامات ءامرين ايتتى.

«ماكروەكونوميكالىق كورسەتكىشتەردىڭ بولجامى نەگىزىندە 2025-2027 -جىلدارعا ارنالعان بيۋدجەت پەن ۇلتتىق قور پارامەترلەرىنىڭ بولجامى قالىپتاستىرىلدى. رەسپۋبليكالىق بيۋدجەت كىرىستەرىن ەسەپتەۋ كەزىندە وتكەن جىلدىڭ ناقتى ورىندالۋى جانە وسى جىلدىڭ التى ايى بويىنشا باعالاۋ قورىتىندىلارى نەگىزگە الىندى. بۇل رەتتە، كىرىستەر 2025 -جىلى 15,6 تريلليون تەڭگە نەمەسە جالپى ىشكى ونىمگە 10,4 پايىز دەڭگەيىندە بولجانادى. وسى جىلدىڭ باعالاۋىمەن سالىستىرعاندا ءوسىم 2,9 تريلليون تەڭگەنى قۇراپ، 2027 -جىلعا قاراي 18,2 تريلليون تەڭگەگە دەيىن نەمەسە 16,4 پايىزعا ءوسۋى كۇتىلەدى»، - دەدى ازامات ءامرين.

ۆيتسە-ءمينيستردىڭ دەرەگىنشە، 2025 -جىلى كىرىستەردىڭ نەگىزگى ءوسۋى كەلەسى فاكتورلارعا بايلانىستى بولجانادى:

1,5 تريلليون تەڭگە - ماكروەكونوميكالىق كورسەتكىشتەردىڭ وزگەرۋى؛

1,3 تريلليون تەڭگە - سالىقتىق جانە كەدەندىك اكىمشىلەندىرۋدى جاقسارتۋ؛

595 ميلليارد تەڭگە - قوسىلعان قۇن سالىعىن قايتارۋ سوماسىن ازايتۋ؛

306 ميلليارد تەڭگە - سالىق سالىناتىن مۇناي ەكسپورتى كولەمىنىڭ ۇلعايۋى؛

78 ميلليارد - تەڭگەنىڭ ا ق ش دوللارىنا باعامىنىڭ وزگەرۋى.

«سالىق تۇسىمدەرىندە ەڭ ۇلكەن ۇلەستى قوسىلعان قۇن سالىعى، كورپوراتيۆتىك تابىس سالىعى الادى. قوسىلعان قۇن سالىعىنىڭ اعىمداعى جىلعى باعالاۋمەن سالىستىرعاندا 1,5 تريلليون تەڭگەگە ارتۋى نومينالدى جالپى ىشكى ءونىمنىڭ وسىمىنەن جانە سالىقتىق اكىمشىلەندىرۋدى جاقسارتۋ ەسەبىنەن بولجانادى. كورپوراتيۆتىك تابىس سالىعى بويىنشا ءوسىم مۇناي ەمەس سەكتوردىڭ جالپى قوسىلعان قۇنىنىڭ ءوسۋى جانە سالىقتىق اكىمشىلەندىرۋدى جاقسارتۋ ەسەبىنەن 1,8 تريلليون تەڭگەگى قۇرايدى. حالىقارالىق ساۋدا جانە سىرتقى وپەراتسيالارعا سالىناتىن سالىقتاردىڭ 276 ميلليارد تەڭگەگە ۇلعايۋى نەگىزىنەن مۇنايعا ەكسپورتتىق كەدەندىك باجدىڭ ءوسۋى ەسەبىنەن بولجانادى. سالىقتىق ەمەس تۇسىمدەر 435 ميلليارد تەڭگە مولشەرىندە ايقىندالدى»، - دەدى ول.

ونىڭ ايتۋىنشا، وسىنى ەسكەرە وتىرىپ، رەسپۋبليكالىق بيۋدجەتتىڭ تەڭگەرىمىن كىرىستەر بازاسى ەسەبىنەن قامتاماسىز ەتۋ ۇلەسى 2025 -جىلى 63,7 پايىزدى، 2026 -جىلى 75,0 پايىزدى جانە 2027 -جىلى 76,9 پايىزدى قۇرايدى.

«جالپى، ەگەر مەملەكەتتىك بيۋدجەت اۋقىمىندا قارايتىن بولساق، جەرگىلىكتى بيۋدجەت كىرىستەرى بويىنشا وڭ ديناميكا بايقالادى. اسىرا ورىندالۋى 2023 -جىلى 660 ميلليارد تەڭگە؛ 2024 -جىلى 800 ميلليارد تەڭگەدەن استام كولەمدە باعالانادى. بۇل سوڭعى جىلدارى جۇرگىزىلىپ جاتقان وڭىرلەردىڭ ءوزىن-ءوزى قامتاماسىز ەتۋىن ارتتىرۋعا باعىتتالعان شارالاردىڭ ناتيجەسى سانالادى»، - دەدى ۆيتسە- مينيستر.

اۆتور

مارلان جيەمباي