گازاداعى اتىستى توقتاتۋ كەلىسىمى كۇشىنە ەندى

استانا. KAZINFORM - گازا سەكتورىنداعى يزرايل مەن پالەستينا كۇشتەرى اراسىنداعى اتىستى توقتاتۋ تۋرالى كەلىسىم 10-قازان كۇنى جەرگىلىكتى ۋاقىت بويىنشا ءتۇس كەزىندە (استانا ۋاقىتى بويىنشا 14:00) كۇشىنە ەندى.

بۇل تۋرالى يزرايل قورعانىس كۇشتەرى (IDF) حابارلادى.

كەلىسىم كۇشىنە ەنگەننەن كەيىن 72 ساعات ىشىندە ءتىرى جانە ءولى يزرايلدىك تۇتقىندار بوساتىلادى.

يزرايل پرەمەر-ءمينيسترىنىڭ كەڭسەسى گازادا قالعان كەپىلگە الىنعانداردى قايتارۋدى جوسپارلاعان وپەراتسيانى «شەكاراعا ورالۋ» دەپ جاريالادى.

ءوز كەزەگىندە يزرايل ءومىر بويىنا باس بوستاندىعىنان ايىرىلعان 250 پالەستينالىق تۇتقىندى، سونداي-اق سوعىس كەزىندە تۇرمەدە وتىرعان قوسىمشا 1700 گازالىقتى بوساتۋى كەرەك.

24 ساعات ىشىندە يزرايل كۇشتەرى گازا سەكتورىنىڭ بىرنەشە ايماعىنان («سارى سىزىق» دەپ اتالاتىن) وڭتۇستىگىندەگى حان يۋنيستەن سولتۇستىكتەگى بەيت-لاحياعا دەيىن شىعارىلادى دەپ جوسپارلانعان.

كەلىسىمنىڭ ءبىرىنشى كەزەڭى بويىنشا يزرايل «سارى سىزىق» ايماعىنا شەگىنىپ، گازا اۋماعىنىڭ 58 پايىزىن ساقتاپ قالادى.

كەلىسىمنىڭ حاماس-تى قارۋسىزداندىرۋ جانە يزرايل اسكەرلەرىن گازادان تولىق شىعارۋدى قامتيتىن كەيىنگى كەزەڭدەرى ءالى كەلىسىلگەن جوق.

ەستەرىڭىزگە سالا كەتەيىك، يزرايل مەن حاماس اراسىنداعى اراداعى كەلىسسوزدەردىڭ ءبىرىنشى راۋندى 6-قازاندا مىسىردا ءوتتى. سارسەنبى كۇنى ا ق ش پرەزيدەنتى دونالد ترامپ يزرايل مەن حاماس-تىڭ گازا سەكتورى بويىنشا كەلىسسوزدىڭ ءبىرىنشى كەزەڭى بويىنشا كەلىسىمگە كەلگەنىن حابارلادى.

بەيسەنبى كۇنى يزرايل ۇكىمەتى پرەمەر-مينيستر بينيامين نەتانياحۋدىڭ تولىق كابينەتى داۋىس بەرۋگە ۇسىنعان اتىستى توقتاتۋ تۋرالى ۇسىنىستى ماقۇلدادى.