گازادا قازا تاپقان پالەستينالىقتاردىڭ سانى 38664 عا جەتتى
استانا. KAZINFORM - يزرايلدىڭ گازا سەكتورىنا جاساعان سوققىلارىنان قازا تاپقان پالەستينالىقتاردىڭ سانى 38664 كە دەيىن ءوستى. بۇل تۋرالى دۇيسەنبىدە انكلاۆتىڭ مەديتسينالىق ورگاندارى حابارلادى، دەپ جازادى شينحۋا.
مالىمدەمەدە ايتىلعانداي، سوڭعى 24 ساعات ىشىندە يزرايل اسكەريلەرى 80 ادامدى ءولتىرىپ، 216 ادامدى جارالادى. وتكەن قازاندا قاقتىعىس باستالعاننان بەرى قازا تاپقانداردىڭ جالپى سانى 38664 كە جەتتى، 89097 ادام جارالاندى.
«ءال-كۋدس بريگادالارى» («يسلامدىق جيھاد» قوزعالىسىنىڭ قارۋلى قاناتى) مۇشەلەرى گازا سەكتورىنىڭ وڭتۇستىگىندەگى رافاح قالاسىنداعى يابنا بوسقىندار لاگەرىندە يزرايلدىك ساربازدار مەن اسكەري كولىكتەردى مينومەتتەن اتقانىن حابارلادى.
يزرايل قورعانىس ارمياسى ءال-كۋدس بريگادالارىنىڭ شابۋىلىنا ءالى تۇسىنىك بەرگەن جوق. دۇيسەنبىنىڭ باسىندا اسكەريلەر گازا سەكتورى بويىنشا وپەراتسيالاردى جالعاستىرىپ جاتقانىن ايتتى. سوڭعى كۇنى يزرايل اسكەري-اۋە كۇشتەرى مەن اسكەري-تەڭىز كۇشتەرى انكلاۆتا «تەرروريستىك نىساندارعا» سوققى بەرىپ، قۇرلىق اسكەرلەرىنە كومەكتەستى.
يزرايل 2023-جىلدىڭ 7-قازانىندا ەلدىڭ وڭتۇستىك ايماقتارىنا جاسالعان توپتىڭ توسىن شابۋىلىنا جاۋاپ رەتىندە گازا سەكتورىندا حاماسقا قارسى اۋقىمدى شابۋىل جاسادى. سالدارىنان 1200 گە جۋىق ادام قازا تاپتى، تاعى 250 دەن استامى كەپىلگە الىندى.