پارتيانىڭ باسپا ءسوز قىزمەتىنىڭ مالىمەتىنشە، جاڭا الاڭ ازاماتتار مەن كاسىپكەرلەردىڭ ءوز قۇقىقتارىن قورعاۋ كەزىندە كەزدەسەتىن سۇراقتاردى شەشۋمەن اينالىسادى. مۇندا ازاماتتاردىڭ قۇقىقتىق ماسەلەلەرىنە قاتىستى جەكە وتىنىشتەرى قارالىپ، قولدانىستاعى زاڭنامانى جەتىلدىرۋ بويىنشا ۇسىنىستار ازىرلەنەدى. بۇل تۋرالى بۇگىن «ادىلەتتى ورتا» جيىنىنىڭ العاشقى وتىرىسىندا پارتيا ءتوراعاسىنىڭ ورىنباسارى نۇرسۇلتان بايتىلەسوۆ مالىمدەدى. القالى جيىنعا قۇرىلتاي دەپۋتاتتارى، مەملەكەتتىك جانە قۇقىق قورعاۋ ورگاندارىنىڭ وكىلدەرى، زاڭگەرلەر مەن قۇقىق سالاسىنىڭ ساراپشىلارى قاتىستى.
ورتالىق «زاڭ مەن ءتارتىپ» قاعيداتىن ىسكە اسىرۋ ماقساتىندا قۇرىلدى. بۇل - مەملەكەتتىك ساياساتتىڭ نەگىزگى باعىتتارىنىڭ ءبىرى. مەملەكەت باسشىسى قازاقستان حالقىنا جولداۋىندا زاڭدى قۇرمەتتەۋ مەن ازاماتتىق جاۋاپكەرشىلىك قوعام ءومىرىنىڭ نەگىزىنە اينالۋى كەرەك ەكەنى اتاپ وتكەن بولاتىن.
پارتيا ءتوراعاسىنىڭ ورىنباسارى نۇرسۇلتان بايتىلەسوۆتىڭ ايتۋىنشا، ازاماتتاردىڭ كەيبىر وتىنىشتەرى قولدانىستاعى زاڭداردى جانە ولاردىڭ ءىس جۇزىندە قالاي ورىندالىپ جاتقانىن جان- جاقتى تالداۋدى قاجەت ەتەدى. سوندىقتان «ادىلەتتى ورتا» تەك وتىنىشتەردى قاراۋمەن شەكتەلمەيدى. باستى ماقسات - قۇقىقتىق ماسەلەلەردىڭ سەبەپتەرىن انىقتاۋ، ولاردىڭ الدىن الۋ جانە بولاشاقتا وسىنداي جاعدايلاردىڭ قايتالانباۋى ءۇشىن ناقتى شەشىمدەر ۇسىنۋ.
- ءبىز ءۇشىن ادىلەتتىلىك تەك قانا زاڭ جۇزىندە نەمەسە كونستيتۋتسيادا عانا جازىلىپ قالعان قاعيدا بولىپ قالماي ءار ادامنىڭ كۇندەلىكتى ومىرىندە سەزىلۋى ماڭىزدى. ءبىز قوعامنىڭ سۇرانىسىن، ساراپشىلاردىڭ مۇمكىندىكتەرىن، دەپۋتاتتاردىڭ جۇمىسىن بىرىكتىرە وتىرىپ، قۇقىق سالاسىنداعى ماڭىزدى ماسەلەلەردى جۇيەلى كوتەرۋگە كۇش سالۋدى كوزدەپ وتىرمىز، - دەدى ول.
«ادىلەتتى ورتا» ورتالىعىنىڭ جەتەكشىسى ابزال قۇسپان نەگىزگى سەگىز باعىتتى تانىستىردى. ولاردىڭ قاتارىندا ازاماتتارعا قۇقىقتىق كەڭەس بەرۋ، زاڭنامانى تالداۋ، زاڭداردى قاراپايىم ءارى تۇسىنىكتى تىلدە ءتۇسىندىرۋ، مەدياتسيانى دامىتۋ جانە داۋلاردى شەشۋگە كومەكتەسۋ قادامدارى بار. سونىمەن قاتار وڭىرلەردەگى قۇقىقتىق ماسەلەلەردى شەشۋگە دە ەرەكشە كوڭىل بولىنەدى.
- ورتالىق جۇمىسى اياسىندا «ءبىر فيليال - ءبىر جەڭىس» جانە «دەپۋتاتتىق كەلىسىمشارت 3-2-1» باستامالارىن جۇزەگە اسىرۋ، سونداي-اق ءبىرىڭعاي بايلانىس ورتالىعىن ۇيىمداستىرۋ جوسپارلانىپ وتىر. باستى مىندەتىمىز - ازاماتتاردىڭ ماسەلەلەرىن سوتقا جەتكىزبەي، تىكەلەي جەرگىلىكتى جەردە شەشۋگە جاعداي جاساۋ. ول ءۇشىن تۇسكەن شاعىمدارعا جاۋاپ بەرىپ قانا قويماي، جۇيەلى ماسەلەلەردى دەر كەزىندە انىقتاپ، ولاردىڭ تۋىنداۋ سەبەپتەرىن جويۋ جانە بولاشاقتا مۇنداي جاعدايلاردىڭ الدىن الۋ ماڭىزدى، - دەدى ابزال قۇسپان.
تاعى ءبىر ماڭىزدى باعىت - قولدانىستاعى زاڭدارداعى قايشىلىقتار مەن ولقىلىقتاردى انىقتاۋ. بۇل جۇمىس جاڭا كونستيتۋتسيا قابىلدانعاننان كەيىن زاڭنامانى جاڭارتۋ جاعدايىندا ەرەكشە وزەكتى بولىپ وتىر.
الداعى وزگەرىستەردىڭ اۋقىمى تۋرالى ادىلەت ۆيتسە- ءمينيسترى بوتاگوز جاقسەلەكوۆا باياندادى. ونىڭ ايتۋىنشا، ءبىرىنشى كەزەڭ اياسىندا مەملەكەتتىك باسقارۋدىڭ جاڭا مودەلىنىڭ جۇمىس ىستەۋىنە قاجەت زاڭنامالىق نەگىز قالىپتاستىرىلعان. اتاپ ايتقاندا، 5 دەربەس كونستيتۋتسيالىق زاڭ جانە 4 ىلەسپە زاڭ قابىلدانىپ، ولار ارقىلى 9 كونستيتۋتسيالىق زاڭعا، 15 كودەكسكە جانە 51 زاڭعا وزگەرىستەر ەنگىزىلدى. قازىرگى ۋاقىتتا كونستيتۋتسيانى ىسكە اسىرۋدىڭ ەكىنشى كەزەڭى جۇرگىزىلۋدە. ول سالالىق زاڭنامانى كونستيتۋتسيانىڭ ەرەجەلەرىنە سايكەستەندىرۋدى كوزدەيدى. مەملەكەتتىك ورگاندار 173 زاڭعا رەداكتسيالىق تۇزەتۋلەر ازىرلەپ، سونداي-اق جەكەلەگەن كونستيتۋتسيالىق جاڭاشىلدىقتاردى مازمۇندىق تۇرعىدان جۇزەگە اسىرۋ جونىندە ۇسىنىستار ەنگىزدى.
جيىندا قازاقستاندىقتاردى ءجيى مازالايتىن ماسەلەلەردى انىقتاۋ جولدارى دا تالقىلاندى. قۇرىلتاي دەپۋتاتى الەكساندر دانيلوۆ eOtinish پلاتفورماسى ارقىلى جولدانعان وتىنىشتەر مەن الەۋمەتتىك جەلىلەردەگى پىكىرلەردى دە تالداۋدى ۇسىندى. مۇنداي ءتاسىل ءجيى قايتالاناتىن جانە جۇيەلى تۇردە شەشۋدى قاجەت ەتەتىن ماسەلەلەردى انىقتاۋعا مۇمكىندىك بەرەدى.
ال دەپۋتات ءۇنزيلا شاپاق زاڭنامانى كەشەندى تۇردە تالداۋ قاجەت ەكەنىنە نازار اۋداردى. ونىڭ ايتۋىنشا، جەكەلەگەن زاڭ نورمالارىن عانا ەمەس، ولاردىڭ ءوزارا بايلانىسىن جانە ءىس جۇزىندە قالاي جۇمىس ىستەيتىنىن دە باعالاۋ ماڭىزدى.
كەزدەسۋ قورىتىندىسى بويىنشا قاتىسۋشىلار زاڭناماداعى ولقىلىقتار مەن قايشىلىقتاردى جويۋعا قاتىستى ۇسىنىستار ازىرلەۋ جۇمىسىن بىرلەسىپ جالعاستىرۋعا ۋاعدالاستى. وسىلايشا، «ادىلەتتى ورتا» ورتالىعى ازاماتتاردىڭ ماسەلەلەرى تالقىلانىپ قانا قويماي، زاڭدار مەن ولاردى قولدانۋ تاجىريبەسىن وزگەرتۋگە باعىتتالعان ناقتى ۇسىنىستار ازىرلەنەتىن الاڭعا اينالماق.