گازا سەكتورىندا اسپاننان تۇسكەن كومەك 5 ادامنىڭ ءومىرىن قيدى

استانا. KAZINFORM - ا ق ش پەن يوردانيا پالەستينالىقتاردىڭ ولىمىنە اكەپ سوققان گۋمانيتارلىق كومەكتىڭ اۋەدەن ءتۇسىرىلۋ وقيعاسىنا قاتىسى جوق ەكەنىن ايتتى، دەپ حابارلايدى DW.

8-ناۋرىز، جۇما كۇنى گازا سەكتورىنا اۋەدەن گۋمانيتارلىق كومەكتىڭ ءتۇسىرىلۋى سالدارىنان بەس ادام قازا تاۋىپ، 11 ادام جاراقات العان. بۇل تۋرالى حاماس باقىلاۋىنداعى جەرگىلىكتى دەنساۋلىق ساقتاۋ مينيسترلىگى مەن وقيعا كۋاگەرىنە سىلتەمە جاساپ CBS News ارناسى حابارلادى.

ا ق ش پەن يوردانيا جازاتايىم وقيعاعا جاۋاپكەرشىلىكتى جوققا شىعارادى. 

8-ناۋرىز، جۇما كۇنى ا ق ش، يوردانيا، مىسىر، فرانسيا، نيدەرلاند جانە بەلگيا گازا سەكتورىنىڭ ۇستىنەن گۋمانيتارلىق كومەك تاستادى. ا ق ش قورعانىس ۆەدومستۆوسى وكىلىنىڭ CBS-كە بايانداعانىنداي، العاشقى تالداۋ قورىتىندىلار امەريكاندىق ۇشاقتىڭ جەردەگى ولىمگە جاۋاپتى ەمەس ەكەنىن كورسەتتى، ءبىراق تەرگەۋدى جالعاستىرۋ قاجەت.

ونىڭ ايتۋىنشا، اسكەريلەر گۋمانيتارلىق جۇك سالىنعان بارلىق جاشىكتەردىڭ شتاتتىق رەجيمدە تۇسىرىلگەنى تۋرالى راستاۋ العان.

يوردانيا بيلىگى دە وقيعاعا قاتىسى جوق ەكەنىن ايتتى. ەلدىڭ مەملەكەتتىك اقپارات اگەنتتىگىنىڭ حابارلاۋىنشا، ۇشاقتاردىڭ ەشقايسىسىندا تەحنيكالىق اقاۋ بولعان جوق.

بەيسەنبى، 7-ناۋرىزدا ا ق ش پرەزيدەنتى دجو بايدەن حالىققا ۇندەۋىندە گازا سەكتورىندا گۋمانيتارلىق جۇكتەردى جەتكىزۋ ءۇشىن ۋاقىتشا پورت سالىناتىنىن حابارلادى.

يزرايل س ءى م باسپا ءسوز حاتشىسى ليور حايات ەل بۇل جوسپاردى قۇپتايتىنىن ايتتى. ونىڭ ايتۋىنشا، بۇل جوسپار «يزرايل ستاندارتتارىنا سايكەس قاۋىپسىزدىك تەكسەرۋلەرى جۇرگىزىلگەننەن كەيىن گازا سەكتورىنا گۋمانيتارلىق كومەكتى ارتتىرۋعا مۇمكىندىك بەرەتىنىن» ايتتى.

سونداي-اق ول يزرايلدىڭ حاماس لاڭكەستىك ۇيىمى تولىعىمەن جويىلىپ، كەپىلگە الىنعانداردىڭ بارلىعى قايتارىلعانشا كۇرەس جالعاساتىنىن جەتكىزدى.