گازا سەكتورىنان ەۆاكۋاتسيالانعان قازاقستان ازاماتتارى قايدا ورنالاستىرىلدى

گازا سەكتورىنان ەۆاكۋاتسيالانعان وتانداستارىمىز قازاقستانعا جەتكىزىلگەننەن كەيىن قايدا ورنالاستىرىلعانى بەلگىلى بولدى، دەپ حابارلايدى Kazinform.

پرەمەر-مينيستر ءاليحان سمايىلوۆ سەنات دەپۋتاتتارىنىڭ ساۋالىنا بەرگەن جاۋابىندا ەلىمىزدىڭ سىرتقى ىستەر مينيسترلىگى توتەنشە جاعداي تۋىنداعان جاعدايدا شەت ەلدە جۇرگەن وتانداستارىمىزدى جەدەل اقپاراتتاندىرۋ، قاجەتتى كومەك كورسەتۋ جانە ەۆاكۋاتسيالاۋ بويىنشا جەدەل ارەكەت جاساپ، بەلسەندى شارالار قابىلدايتىندىعىن ايتادى.

«بۇگىندە پالەستينادان مىسىرعا «رافاح» باقىلاۋ-وتكىزۋ بەكەتى ارقىلى قازاقستان رەسپۋبليكاسىنىڭ 99 ازاماتى مەن ولاردىڭ وتباسى مۇشەلەرى، ونىڭ ىشىندە 44 بالا ەۆاكۋاتسيالاندى. ەۆاكۋاتسيالانعان ازاماتتار قازاقستانعا جەتكىزىلگەننەن كەيىن الماتى قالاسىنداعى «پانا» ارناۋلى بەيىمدەۋ ورتالىعىنا ورنالاستىرىلدى. ولارمەن مۇنان ارعى جۇمىستى جەرگىلىكتى اتقارۋشى ورگاندار جۇرگىزەدى»، - دەپ اتاپ وتەدى ۇكىمەت باسشىسى جاۋابىندا.

بۇعان دەيىن قاسىم-جومارت توقايەۆتىڭ تاپسىرماسىنا سايكەس قر سىرتقى ىستەر مينيسترلىگى گازا سەكتورىنداعى قازاقستاندىقتاردى ەۆاكۋاتسيالاپ، 17-قاراشادا الماتىعا جەتكىزگەنىن جازعان ەدىك.

وسىدان كەيىن سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ پالەستينانىڭ گازا سەكتورىنان ەۆاكۋاتسيالانعان وتانداستارىمىزدىڭ بالا-شاعاسىنا قانداي مارتەبە بەرىلەتىنىن ايتقان بولاتىن.

اۆتور

مارلان جيەمباي