ايگىلى «قورلان» ءانىنىڭ اۆتورى ەستايدىڭ تۋعانىنا 150 جىل تولدى

استانا. KAZINFORM - اقىن، ءانشى، كومپوزيتور، قازاقستاننىڭ ەڭبەك سىڭىرگەن ونەر قايراتكەرى، قازاقستان كومپوزيتورلار وداعىنىڭ العاشقى مۇشەلەرىنىڭ ءبىرى ەستاي بەركىمباي ۇلىنىڭ تۋعانىنا - 150 جىل.

اقىن جاستايىنان ءبىرجان سال، اقان سەرى، ۇكىلى ىبىرايدى تىڭداپ ءوسىپ، بالۋان شولاق، ساتماعانبەت، شاشۋباي سىندى ءانشى-اقىندارمەن بىرگە ءان سالىپ، حالىققا تانىمال بولدى.

ەستاي بەركىمباي ۇلى اقىندىق، ورىنداۋشىلىق ونەرىمەن قاتار شەبەر كومپوزيتور رەتىندە تانىمال بولعان. ونىڭ اندەرى سال-سەرىلەر ءداستۇرىن ىلگەرى دامىتتى.

كومپوزيتوردىڭ العاشقى تۋىندىسى - «شولپان قاققان» ءانى. ونىڭ «جايقوڭىر»، «نازقوڭىر»، «مايدا قوڭىر»، «قورلان»، «ساندۋعاش»، «يۋران-اي»، «ءبىر مىسقال»، «اشۋ - پىشاق»، «دۇنيە-اي»، «ەركەم»، «گۇلنارايىم»، «قوشتاسۋ»، «قالامقاس»، «عاشىق»، «قاراكوز» اندەرى - قازاق مۋزىكاسىنىڭ التىن قورىنا ەندى.

ەستايدىڭ ءانشى-اقىندىق، سازگەرلىك تالانتىن بۇكىل قازاق دالاسىنا ءماشھۇر ەتكەن ءانى - «قورلان». بۇل ءاندى كومپوزيتورلار م. تولەبايەۆ «ءبىرجان - سارا»، ە. برۋسيلوسكي «ەر تارعىن» وپەرالارىندا پايدالانعان.

اتاقتى مۋزىكا زەرتتەۋشىسى ا. زاتايەۆيچ ەستاي بەركىمباي ۇلى اندەرىن تۇڭعىش رەت نوتاعا تۇسىرگەن. ال ا. جۇبانوۆ پەن ب. ەرزاكوۆيچ ەستاي بەركىمباي ۇلىنىڭ ءومىرى مەن شىعارماشىلىعى تۋرالى زەرتتەۋ ەڭبەكتەر جازدى.

قازاق مۋزىكا ونەرىن جىر-جاۋھارلارىمەن بايىتقان بىرەگەي تۇلعاعا قازاقستاننىڭ ەڭبەك سىڭىرگەن ونەر قايراتكەرى اتاعى بەرىلدى.

اۆتور

اسحات رايقۇل