ايگىلى كومپوزيتور ءشامشى قالداياقوۆتىڭ وتباسى اۆتورلار قوعامىنىڭ قىزمەتىن تەكسەرۋدى سۇرادى

استانا. KAZINFORM - بوتاگوز قالداياقوۆا ادىلەت مينيسترلىگى اۆتورلار قوعامىنىڭ قىزمەتىن تەكسەرۋ كەرەك ەكەنىن سۇراپ وتىر. كومپوزيتوردىڭ وتباسى اۆتورلىق قۇقىقتى باسقارۋعا كوڭىلى تولمايدى.

«2019 -جىلدان بەرى تولەمدەر توقتاتىلدى. قازىر از مولشەردە ءجۇرىپ جاتىر. كۇنى كەشە عانا ءبىر توقسانعا 55 حيت ءاننىڭ اۆتورى ءشامشى قالداياقوۆتىڭ شىعارمالارىن پايدالانعانى ءۇشىن 22 مىڭ تەڭگە الدىق. بۇل ءانۇراننان بولەك، ويتكەنى قازىر ءانۇران - مەملەكەتتىڭ مەنشىگى»، - دەيدى بوتاگوز قالداياقوۆا.

ول قالداياقوۆ اتىنداعى قوردىڭ ديرەكتورى رەتىندە كوپتەگەن ءىس- شارانى وتكىزۋ ءۇشىن ۇنەمى قاراجات ىزدەيتىنىن، بۇل رەتتە اۆتورلار قوعامى شىن مانىندە ۇلكەن قارجى جينايتىنىن ايتتى. سونداي-اق، ول قايرات نۇرتاستىڭ ءان ماتىندەرىنىڭ اۆتورىنا تولەنەتىن تولەمدى تىلگە تيەك ەتتى.

ونىڭ ايتۋىنشا، اۆتور ولەڭدەرى ءۇشىن 1 ميلليون تەڭگەدەن باستاپ الادى.

اتالعان ماسەلەگە بايلانىستى ادىلەت ۆيتسە- ءمينيسترى بوتاگوز جاقسەلەكوۆا تەكسەرۋ جۇرگىزۋگە ۋادە بەردى.