الماتى، جامبىل جانە تۇركىستان وبلىستارىنداعى جالپى اۋماعى 500 گەكتارعا دەيىنگى الما باقتارىندا جۇرگىزىلگەن سىناقتار قورعاۋ قۇرالدارىنىڭ تيىمدىلىگىن كورسەتتى. الما اعاشتارىن كەشەندى قورعاۋ جۇيەسىنىڭ تيىمدىلىگى وندىرىستىك جاعدايدا 92 پايىزعا، ال شاعىن ۋچاسكەلەردە جۇرگىزىلگەن تاجىريبەلەردە 95 پايىزعا دەيىن جەتتى.
بيولوگيالىق قۇرالداردى ج. جيەمبايەۆ اتىنداعى قازاق وسىمدىك قورعاۋ جانە كارانتين عىلىمي- زەرتتەۋ ينستيتۋتىنىڭ عالىمدارى ميكروبيولوگيا جانە ۆيرۋسولوگيا ينستيتۋتىنىڭ ماماندارىمەن بىرلەسىپ، ءسۇت قىشقىلدى باكتەريالار نەگىزىندە ازىرلەدى. قازاق وسىمدىك قورعاۋ جانە كارانتين عىلىمي- زەرتتەۋ ينستيتۋتىنىڭ ماماندارى پرەپاراتتاردى وندىرىستىك جاعدايدا سىناقتان وتكىزىپ، ولاردى قولدانۋ تاسىلدەرىن جەتىلدىردى. سونداي-اق شارۋاشىلىقتاردا جۇرگىزىلگەن تاجىريبەلەر ارقىلى الما باقتارىن قورعاۋ جۇيەسىنىڭ تيىمدىلىگىن باعالادى.
- سىناق ناتيجەلەرى بويىنشا تۇركىستان وبلىسىندا الما اعاشتارىن اۋرۋدان قورعاۋ تيىمدىلىگى 90-92 پايىزعا جەتىپ، ونىمدىلىك ءار گەكتاردان 2 توننادان استام ارتتى. الماتى وبلىسىندا باكتەريالىق كۇيىككە بەيىم «اپورت» سورتى بويىنشا قورعاۋ تيىمدىلىگى 84 پايىزعا دەيىن جەتتى. بۇل وڭىردە ونىمدىلىك ءار گەكتاردان 1,5-2 تونناعا ارتتى، - دەيدى ماماندار.
«اپورت» سورتىنا جۇرگىزىلگەن جەكەلەگەن زەرتتەۋلەر دە وڭ ناتيجە كورسەتتى. بيولوگيالىق پرەپاراتتاردى ەكى رەت قولدانعاننان كەيىن باكتەريالىق كۇيىكتىڭ تارالۋى مەن دامۋ دەڭگەيى شامامەن سەگىز ەسە تومەندەگەن.
جاڭا ازىرلەمەنىڭ ماڭىزدى تۇستارىنىڭ ءبىرى - باكتەريالىق كۇيىككە بەيىم تاريحي «الماتى اپورتى» سورتىن ساقتاۋعا ۇلەس قوسۋ مۇمكىندىگى. وتاندىق بيولوگيالىق پرەپاراتتار الما اعاشتارىن قورعاۋدىڭ جەكە قۇرالى رەتىندە عانا ەمەس، بيولوگيالىق ادىستەر مەن وزگە دە فيتوسانيتاريالىق شارالاردى ۇشتاستىراتىن كەشەندى قورعاۋ جۇيەسىنىڭ قۇرامداس بولىگى رەتىندە قولدانىلادى.
سىناق ناتيجەلەرى وتاندىق عالىمدار ازىرلەگەن بيولوگيالىق پرەپاراتتاردىڭ جەمىس اعاشتارىن قورعاۋداعى الەۋەتىن كورسەتتى. بۇل جۇمىس قازاقستاندا وسىمدىكتەردى بيولوگيالىق جولمەن قورعاۋ تەحنولوگيالارىن دامىتۋعا جانە وتاندىق عىلىمي ازىرلەمەلەردى اۋىل شارۋاشىلىعى وندىرىسىنە كەڭىنەن ەنگىزۋگە مۇمكىندىك بەرەدى.
بۇعان دەيىن ب ۇ ۇ الماتى اپورتىنىڭ داڭقىن قايتارۋعا قولداۋ كورسەتەتىنىن جازعانبىز.