ايىپپۇل تولەۋ: الەم ەلدەرىندە زاڭ بۇزعاندار قالاي جازالانادى؟

استانا. KAZINFORM - تارتىپكە باعىنعان قۇل بولمايدى. دەسە دە مۇنى ۇمىتىپ جاتاتىن جاندار ءجيى كەزدەسەدى. ال ولارمەن كۇرەسۋ ءۇشىن ءار ەل وزىنە ساي زاڭدىق نورمالاردى، قۇقىقتىق ەرەجەلەردى قابىلداپ، ءتارتىپ بۇزۋشىلىقتى تەجەۋگە بارىنشا كۇش سالىپ كەلەدى.

سينگاپۋر - بۇكىل الەمگە تازالىق پەن قىلمىستىڭ وتە تومەن دەڭگەيىمەن تانىمال قالا. سەبەبى بۇل ەلدە ءتارتىپتى بۇزعان، تابيعاتتى لاستاعان ادامعا بىردەن ايىپپۇل سالىنادى. ماسەلەن، كوشەدە قوقىستى تاستاۋ، قوعامدىق كولىكتە تاماقتانۋ نەمەسە الكوگولدى ىشىمدىك ءىشۋدىڭ ءوزى مىڭداعان دوللار ايىپپۇلعا اكەلۋى مۇمكىن. ساعىز شايناۋعا جانە ونى ساتۋعا رۇقسات جوق.

ءتىپتى دالاداعى قۇستى تاماقتاندىرۋعا دا تىيىم سالىنعان. ەرەجەنى ەلەمەگەندەر بىردەن اكىمشىلىك جاۋاپقا تارتىلادى. سوندىقتان دا سينگاپۋردى كوبىنە «fine city» دەپ تە اتايدى. ول قازاق تىلىندە ايىپپۇلدار قالاسى دەگەن ماعىنا بىلدىرەدى.

فرانسيادا قاشقىن اتا-انالار 15 مىڭ ەۋرو كولەمىندە ايىپپۇل تولەيدى. ءتىپتى 2 جىلعا باس بوستاندىعىنان ايىرىلۋ مۇمكىن. ەل زاڭىنا سايكەس اليمەنت تولەۋشى ادامنىڭ تۇرعىلىقتى مەكەنجايى نەمەسە قارجىلىق جاعدايى وزگەرسە، بىردەن ءتيىستى ورگاندارعا حابار بەرۋى ءتيىس. ايتپەسە 6 ايعا دەيىن تەمىر تورعا قامالىپ، 7,5 مىڭ ەۋرو ايىپپۇل ارقالايدى. ءبىراق زاڭنىڭ قاتاڭدىعىنا قاراماستان فرانسيادا اليمەنتتىڭ % 30-40- ءى ۋاقىتىلى تولەنبەيدى.

ال تۇركيادا اجىراسقان ەركەك بۇرىنعى ايەلى قايتا تۇرمىس قۇرعانشا اليمەنت تولەۋگە مىندەتتى. زاڭعا باعىنباعاندار 3 جىلعا دەيىن باس بوستاندىعىنان ايىرىلادى. اباقتىدان مەرزىمىنەن بۇرىن بوساۋ ءۇشىن الدىمەن اليمەنتتى تولىق تولەۋى قاجەت. جالپى اليمەنت بالاعا عانا ەمەس، اناعا دا تولەنەدى. سوندىقتان ەر ادامدار ءبىرىنشى بالاسى مەن ايەلىنىڭ جاعدايىن جاساۋدى ويلايدى. سول ءۇشىن دە ەرلى- زايىپتىلاردىڭ اجىراسۋى از كەزدەسەدى.

ا ق ش- تا جىلدامدىقتى اسىرعانى ءۇشىن ازاماتتار 1000-2500 دوللار كولەمىندە ايىپ تولەيدى. ونىڭ مولشەرى جول ەرەجەسىنىڭ قاي شتاتتا بۇزىلعانى بايلانىستى. ىشىمدىك ءىشىپ، رولگە وتىرعاندار ءۇشىن دە ءار ءوڭىردىڭ دەربەس زاڭدارى بار. ونىڭ ەڭ قاتالى يللينويس شتاتىندا. ءومىر بويىنا جۇرگىزۋشىلىك كۋالىگىنەن ايىرۋ، 3 جىل تۇرمەگە توعىتۋ جانە 25000 دوللار ايىپ تولەتۋ قاراستىرىلعان.