ايىپپۇل ارقالاۋىڭىز مۇمكىن: مينيسترلىك جۇرگىزۋشىلەرگە ءۇن قاتتى

قازاقستاندا جۇرگىزۋشىلەردىڭ ەڭبەك جانە دەمالىس رەجيمىن ساقتاۋىن قاداعالاۋ كۇشەيتىلدى.

جۇرگىزۋشى نە ءبىلۋى كەرەك؟

كولىك جۇرگىزۋدىڭ كۇندەلىكتى ۇزاقتىعى قولدانىستاعى قاعيداعا سايكەس 9 ساعاتتان اسپاۋى كەرەك. ءتورت جارىم ساعات بويى ۇزدىكسىز كولىك جۇرگىزگەننەن كەيىن جۇرگىزۋشى كەمىندە 45 مينۋت ءۇزىلىس جاساۋعا ءتيىس.

مينيسترلىك قانداي تەكسەرىس جۇرگىزىپ جاتىر؟

كولىك مينيسترلىگى اۆتوبۋستار مەن جۇك كولىگى جۇرگىزۋشىلەرىنىڭ جولاۋشىلاردى، باگاجدى نەمەسە جۇكتى تاسىمالداۋ كەزىندە ەڭبەك جانە دەمالىس رەجيمىن ساقتاۋىن باقىلاۋ بويىنشا اۋقىمدى اكسيا وتكىزىپ جاتىر.

اكسيا باستالعالى جالپى سوماسى 4 ميلليون تەڭگەدەن اسا اكىمشىلىك قۇقىقبۇزۋشىلىق تۋرالى 218 حاتتاما تولتىردى.

"تاحوگراف - جۇرگىزۋشىنىڭ ەڭبەك جانە دەمالىس رەجيمىن، قوزعالىس جىلدامدىعىن، ءجۇرىپ وتكەن جولىن ۇزدىكسىز تىركەيتىن ساندىق قۇرىلعى. بۇل قۇرىلعى جول قوزعالىسى قاۋىپسىزدىگىن قامتاماسىز ەتۋگە مۇمكىندىك بەرەدى. قالاارالىق جانە حالىقارالىق تاسىمال بارىسىندا بولۋى مۇمكىن جول كولىك وقيعالارىنىڭ باستى سەبەپتەرىنىڭ ءبىرى - جۇرگىزۋشىنىڭ رەجيمدى ساقتاماي، شارشاۋى نەمەسە رۇقسات ەتىلگەن قوزعالىس جىلدامدىعىن اسىرۋى"، - دەدى اۆتوموبيل كولىگى جانە كولىكتىك باقىلاۋ كوميتەتىنىڭ باس ساراپشىسى كۇنايىم كاميەۆا.

ايتا كەتەيىك، جىل باسىنان بەرى 2700 دەن اسا اۋىر جۇك كولىگى مەن اۆتوبۋس جۇرگىزۋشىسى ەڭبەك جانە دەمالىس رەجيمىن بۇزعان. ايىپپۇلدىڭ جالپى سوماسى 48 ميلليون تەڭگەدەن استى.

قانداي كولىكتەرگە تاحوگرافتار كەرەك؟

- قاۋىپتى جۇكتەردى تاسىمالدايتىن؛

- جولاۋشىلاردى، باگاجدى جانە جۇكتەردى اۆتوموبيلمەن حالىقارالىق دەڭگەيدە تاسىمالدايتىن؛

- جولاۋشىلاردى جانە باگاجدى اۆتوموبيلمەن وبلىسارالىق، قالاارالىق دەڭگەيدە تۇراقتى تاسىمالدايتىن؛

- جولاۋشىلاردى جانە باگاجدى اۆتوموبيلمەن وبلىسارالىق، قالاارالىق، اۋدانارالىق دەڭگەيدە تۇراقتى ەمەس تاسىمالدايتىن كولىكتەر جاتادى.

قاعيدا تالاپتارى ساقتالماعان جاعدايدا اكىمشىلىك قۇقىقبۇزۋشىلىق تۋرالى كودەكستىڭ 572-بابىمەن تاسىمالداۋشىلارعا 10 اە ك- تەن 50 ا ە ك (36920 - 184600 ت گ) ارالىعىندا، جۇرگىزۋشىلەرگە 10 ا ە ك (36920 ت گ) كولەمىندە اكىمشىلىك ايىپپۇل سالۋ كوزدەلگەن.

Massaget.kz