استانا قالاسى بويىنشا مەملەكەتتىك كىرىستەر دەپارتامەنتىنىڭ «اۋەجاي - استانا» كەدەن بەكەتىنىڭ قىزمەتكەرلەرى موبيلدى قۇرىلعىلاردى زاڭسىز اكەلۋدىڭ 10 فاكتىسىنىڭ جولىن كەستى. بارلىعى 223 iPhone 18 سمارتفونى جانە 10 AirPods سىمسىز قۇلاققابى انىقتالدى.
- كەدەندىك باقىلاۋ بارىسىندا جولاۋشىلاردىڭ باگاجىندا كوپ مولشەردە موبيلدى قۇرىلعىلاردى «جاسىل ءدالىز» ارقىلى، ياعني كەدەندىك دەكلاراتسيانى ۇسىنباستان الىپ وتكەنى انىقتالدى. اتاپ ايتقاندا، ءبىر جاعدايدا جولاۋشى باگاجىندا بىردەن 50 سمارتفوندى اكەلۋگە ارەكەت جاساعان. بۇل جەكە تۇلعانىڭ كەدەندىك تولەمدەردى تولەمەي جانە دەكلاراتسيالاماي، جەكە پايدالانۋعا ارنالعان تاۋار رەتىندە الىپ وتۋىنە بەلگىلەنگەن مولشەردەن ەداۋىر اسىپ تۇسەدى. انىقتالعان فاكتىلەر بويىنشا 4 تۇلعانىڭ جەكە كاسىپكەر مارتەبەسى بولعانى، تاعى 4 تۇلعانىڭ جەكە كاسىپكەر رەتىندە تىركەلمەي تاۋار اكەلگەنى انىقتالدى،- دەيدى دەپارتامەنت ماماندارى.
مەملەكەتتىك كىرىستەر كوميتەتى تاۋارلاردى كەدەندىك شەكارا ارقىلى وتكىزۋ كەزىندە زاڭنامادا بەلگىلەنگەن جەكە پايدالانۋعا ارنالعان تاۋارلارعا قاتىستى ولشەمشارتتاردى ەسكەرۋ قاجەتتىگىن ەسكە سالادى. ۇيالى تەلەفوندارعا قاتىستى جەكە تۇلعالارعا ءبىر ادامعا 2 سمارتفوننان ارتىق ەمەس مولشەردە الىپ وتۋگە رۇقسات ەتىلەدى.
- ەگەر وتكىزىلەتىن تاۋارلاردىڭ سانى نەمەسە سيپاتى جەكە پايدالانۋعا ارنالعان تاۋارلارعا بەلگىلەنگەن ولشەمشارتتارعا سايكەس كەلمەسە، ولار كەدەندىك دەكلاراتسيالاۋعا جانە ءتيىستى كەدەندىك راسىمدەۋگە جاتادى. انىقتالعان موبيلدى قۇرىلعىلار ۋاقىتشا ساقتاۋ قويماسىنا ورنالاستىرىلدى. انىقتالعان فاكتىلەر بويىنشا زاڭنامادا كوزدەلگەن اكىمشىلىك جاۋاپكەرشىلىك شارالارى قابىلدانىپ جاتىر، - دەدى ولار.
ءتيىستى تالاپتار «قازاقستان رەسپۋبليكاسى قارجى ءمينيسترىنىڭ 2015-جىلعى 31 -ناۋرىزداعى № 250 بۇيرىعى - جەكە تۇلعالار وتكىزەتىن تاۋارلاردى كەدەن وداعىنىڭ كەدەندىك شەكاراسى ارقىلى جەكە پايدالانۋعا ارنالعان تاۋارلارعا جاتقىزۋ كريتەريلەرى» بۇيرىعىمەن بەلگىلەنگەن.