ايتۋ دا، اتقارۋ دا ماڭىزدى - سەناتور

سەناتور نۇرتورە ءجۇسىپ مەملەكەت باسشىسى «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسىندا ەلىمىزدەگى اگروونەركاسىپتىك كەشەندى دامىتۋ بويىنشا جاڭا مىندەتتەر بەلگىلەگەنىن ايتتى.

«اۋىل شارۋاشىلىعى ەكونوميكانىڭ جاڭا قوزعاۋشى كۇشىنە اينالادى. الداعى جىلداردا اۋىل- ايماقتى وركەندەتۋگە باسىمدىق بەرەمىز. ءبىز اۋىلدىق جەردى جۇمىسپەن جاپپاي قامتۋ ءۇشىن جاعداي جاسايمىز، اۋىل تۇرعىندارىنىڭ كاسىپكەرلىك باستامالارىن قولدايمىز. تۇرعىندارعا جەر قولجەتىمدى بولادى. ول ءۇشىن ءىرى جەر يەلەرىنەن پايدالانىلمايتىن جەر تەلىمدەرىن مەملەكەت مەنشىگىنە قايتارۋ جۇمىستارىن جانداندىرامىز»، - دەلىنگەن سايلاۋالدى باعدارلامادا.

مەملەكەت باسشىسى اتاپ وتكەندەي، سۋ ۇنەمدەيتىن ءتيىمدى تەحنولوگيا ەنگىزىپ، مەليوراتسيا جانە سۋارۋ جۇيەسىن قالپىنا كەلتىرۋ كەرەك. سونىمەن قاتار مەملەكەت اۋىل شارۋاشىلىعى كووپەراتيۆتەرىن ۇيىمداستىرۋ بويىنشا كەڭ اۋقىمدى جوبانى ىسكە اسىرىپ جاتىر.

«كووپەراتيۆتەر ەگىستىكتەن دۇكەن سورەسىنە دەيىن ءونىمدى تىكەلەي جەتكىزۋشى بولادى. ءتيىمسىز دەلدالداردان ارىلامىز»، - دەلىنگەن قۇجاتتا.

- جەڭىلدەتىلگەن ليزينگ باعدارلاماسى اياسىندا شارۋالار 40 ميلليارد تەڭگەگە 1053 كومباين مەن تراكتور ساتىپ الدى.

- 2,8 مىڭ بىرلىك مال ازىعىن جيناۋ تەحنيكاسىن ساتىپ الۋعا 20 ميلليارد تەڭگە ءبولىندى.

- 8 ميلليون گەكتار پايدالانىلماي جاتقان جەر مەملەكەتكە قايتارىلدى.

- اۋىل شارۋاشىلىعى كووپەراتسياسىن دامىتۋ جانە اۋىل تۇرعىندارىنىڭ تابىسىن ارتتىرۋ ماقساتىندا «اۋىل اماناتى» جوباسى جۇزەگە اسىرىلۋدا. جوبا اياسىندا رەسپۋبليكاداعى بارلىق جەكە قوسالقى شارۋاشىلىقتىڭ جارتىسىن كووپەراتيۆتىك كاسىپكەرلىككە تارتۋ، شاعىن نەسيە بەرۋ ەسەبىنەن 350 مىڭنان استام جۇمىس ورنىن قۇرۋ جانە وتكىزۋ نارىعىنا شىعۋدى قامتاماسىز ەتۋ كوزدەلىپ وتىر. 1 ميلليوننان استام اۋىل تۇرعىنىن قامتيتىن جوبانى جۇزەگە اسىرۋعا بارلىعى 1 تريلليون تەڭگە قاراستىرىلعان.

- 2023 -جىلى رەسپۋبليكالىق بيۋدجەتتەن 17 مىڭ شاعىن نەسيە بەرۋ ءۇشىن 100 ميلليارد تەڭگە ءبولىندى. بۇل اۋىلدىق جەرلەردە 18 مىڭنان استام جاڭا جۇمىس ورنىن اشۋعا مۇمكىندىك بەرەدى. بۇگىندە شىعىس قازاقستان، قوستاناي جانە پاۆلودار وبلىستارىندا قاراجات تولىعىمەن يگەرىلدى. باسقا وڭىرلەردە جۇمىس جالعاسىپ جاتىر.

- ەلدى سۋمەن قامتاماسىز ەتۋگە قاتىستى وزەكتى ماسەلەلەردى شەشۋدى كوزدەيتىن جاڭا سۋ كودەكسىنىڭ جوباسى ازىرلەندى. جوبا سۋمەن جابدىقتاۋ، سۋ بۇرۋ، سۋارۋ ماسەلەلەرى، سۋ شارۋاشىلىعى نىساندارىنىڭ قاۋىپسىزدىگى سياقتى كوپتەگەن باعىتتاردى قامتيدى.

- ەلدىڭ سۋ شارۋاشىلىعى جۇيەسىن جاڭعىرتۋ جۇمىستارى جالعاسىن تاۋىپ كەلەدى. ماسەلەن، 2025 -جىلعا دەيىن جامبىل، قىزىلوردا، الماتى، اقمولا جانە باتىس قازاقستان وبلىستارىندا جاڭا 9 سۋ قويماسىن سالۋ جوسپارلانىپ وتىر. ونى اۋىل شارۋاشىلىعى مەن ونەركاسىپتە پايدالانۋ جوسپارلانعان.

ەكىنشى كەزەڭدە اقتوبە، قىزىلوردا، شىعىس قازاقستان جانە قاراعاندى وبلىستارىندا 11 سۋ قويماسىن سالۋ قاراستىرىلعان.

سونىمەن قاتار رەسپۋبليكاداعى سۋارمالى اۋىل شارۋاشىلىعى القاپتارىنىڭ جالپى اۋدانىن 1,8 ميلليون گەكتاردان 2,5 ميلليون گەكتارعا دەيىن ۇلعايتۋ، قولدانىستاعى 15 سۋ قويماسى مەن 3,5 مىڭ شاقىرىم سۋارۋ جەلىلەرىن كۇردەلى جوندەۋ، سونداي- اق 212 كانالدىڭ سۋدى ەسەپكە الۋ جۇيەسىن سيفرلاندىرۋ جوسپارلانىپ وتىر.

اۆتور

ابىلايحان جۇماشيەۆ