اۋىر كولىكتەرگە اۆتوجولدا جۇك تاسىمالداۋعا قاشان تىيىم سالىنادى

استانا. KAZINFORM – ق ر كولىك مينيسترلىگى كارەرلىك اۋىر جۇك كولىكتەرىنىڭ جالپىعا ورتاق پايدالانىلاتىن اۆتوجولدارمەن جۇرۋىنە تىيىم سالۋعا قاتىستى تۇسىنىك بەردى.

«2022-جىلى «اۆتوموبيل كولىگى تۋرالى» زاڭدا 2026-جىلعى 1-قاڭتاردان باستاپ اۋىر جۇك كولىكتەرىنىڭ رۇقسات ەتىلگەن جالپى سالماعى بەلگىلەنگەن نورمادان اسىپ كەتسە، جالپىعا ورتاق پايدالانىلاتىن اۆتوجولداردا جۇكتەردى تاسىمالداۋعا تىيىم سالۋ ەسكەرىلگەن. قازىرگى كەزدە مينيسترلىك جالپى پايدالانىمداعى اۆتوجولدار بويىنشا اۋىر سالماقتى (جۇكسىز سالماعى 12 توننادان اساتىن) وسىنداي كولىكتەرمەن جۇكتەردى تاسىمالداۋعا تىيىم سالۋدى ەنگىزۋ مەرزىمىن 2025-جىلعى 1-قاڭتارعا اۋىستىرۋ بولىگىندە ءتيىستى جۇمىستى اتقارىپ جاتىر»، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ۆەدومستۆو مالىمەتىنشە، زاڭنامالىق تۇزەتۋلەر ق ر ۇكىمەتى رەگلامەنتىنىڭ 124-تارماعىنىڭ اياسىندا ق ر پارلامەنتىندە قارالىپ جاتقان زاڭ جوبالارى ارقىلى جۇزەگە اسىرىلادى.

«كورسەتىلگەن ءىس-شارالار ارقىلى اۋىر سالماقتى كولىك قۇرالدارىنىڭ ءجۇرىپ ءوتۋىن باقىلاۋ ماسەلەلەرىن شەشۋ جانە كولىكتىك باقىلاۋداعى سىبايلاس جەمقورلىق تاۋەكەلدەرىن ازايتۋ جوسپارلانىپ وتىر»، - دەپ اتالىپ وتكەن كولىك مينيسترلىگى اقپاراتىندا.

ەسكە سالساق، بيىل ماۋسىم ايىندا ق ر كولىك ءمينيسترى مارات قارابايەۆ كارەردە جۇرۋگە ارنالعان HOWO جانە SHACMAN كولىكتەرىنە ەلىمىزدىڭ جولدارىندا جۇك تاسىمالداۋعا تىيىم سالىناتىنىن ايتتى.