اۋىر جانە اسا اۋىر قىلمىس جاساعانداردى مەرزىمىنەن بۇرىن بوساتۋ شارتى وزگەرەدى

استانا. KAZINFORM - قازاقستان رەسپۋبليكاسىنىڭ قىلمىستىق كودەكسىنە ءبىرقاتار وزگەرىس ەنگىزىلەدى. تولىعىراق ادىلەت مينيسترلىگى قوعامدىق ءتارتىپ سالاسىنداعى زاڭناما دەپارتامەنتىنىڭ ديرەكتورى دۋمان سۇلەيمەنوۆ ايتىپ بەردى.

- قىلمىستىق-اتقارۋ زاڭناماسىندا اۋىر جانە اسا اۋىر قىلمىستار ءۇشىن شارتتى مەرزىمنەن بۇرىن بوساتۋ، مەرزىمدى ەسەپتەۋ جانە جازاسىن وتەۋدىڭ قاتاڭ شارتتارىنا وزگەرىستەر ەنگىزىلەدى. بۇل دەگەنىمىز قىلمىستىق كودەكستىڭ 72,73 جانە 79 بابى. اتالعان شارا ادام ءومىرى نەمەسە دەنساۋلىعىنا قارسى قىلمىستارعا قاتىستى قۇقىق بۇزۋشىلىق جاساعاندار ءۇشىن جازانى كۇشەيتۋگە باعىتتالعان، - دەدى دۋمان سۇلەيمەنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان ءارى ادىلەت مينيسترلىگىنىڭ وكىلى كوللەكتورلار قىزمەتىنىڭ جاۋاپكەرشىلىگى كۇشەيەتىنىن تىلگە تيەك ەتتى.

- كوللەكتورلاردىڭ قىزمەتىن تەرىس پايدالانۋ جايتتارى بويىنشا، ياعني قارىزدى ءوندىرۋدىڭ زاڭعا جات تاسىلدەرىن قولدانۋ، قارجىلىق قىزمەت تۇتىنۋشىلاردىڭ قۇقىعىن بۇزۋ جانە وزگە دە ارەكەتتەر ءۇشىن جاۋاپكەرشىلىك قاتايادى (قىلمىستىق كودەكستىڭ 251,252-باپتارى). قازىر 214 جانە 223-بابى كوللەكتورلاردى ءىرى زالال كەلتىرۋ جاعدايىندا عانا جاۋاپقا تارتادى. كوللەكتورلار قۇزىرەتىن جەكە پايداسىنا نەمەسە ءۇشىنشى تۇلعا پايداسىنا اسىرا قولدانۋى، قوعامعا تونگەن قاۋىپ. سوندىقتان كوللەكتورلىق اگەنتتىك قىزمەتكەرلەرىنىڭ مانسابىن اسىرا پايدالانۋ ارەكەتتەرىنە قىلمىستىق جاۋاپكەرشىلىك ەنگىزۋ ۇسىنىلادى، - دەپ تولىقتىردى ۆەدومستۆو وكىلى.

ەسكە سالساق، جىل باسىندا ىشكى ىستەر مينيسترلىگى ەلىمىزدە اۋىر قىلمىس سانى ايتارلىقتاي تومەندەگەنىن حابارلادى.