اۋىر اتلەتيكادان باپكەر بولعان الەكسەي ني ءومىرىنىڭ سوڭىنا دەيىن سپورتتان شەتتەتىلدى

اۋىر اتلەتيكادان قازاقستان قۇراماسىنىڭ بۇرىنعى باس باپكەرى الەكسەي نيگە اۋىر اتلەتتەرگە قاساقانا دوپينگ ىشكىزگەنى ءۇشىن اۋىر جازا بەرىلدى، - دەپ حابارلايدى 1bol.kz.

باپكەر ءومىرىنىڭ سوڭىنا دەيىن سپورتتان شەتتەتىلدى. حالىقارالىق وليمپيادا كوميتەتىنىڭ باستاماسىمەن 2017 -جىلى قۇرىلعان تەستىلەۋ جونىندەگى حالىقارالىق اگەنتتىك (ITA) وسىنداي شەشىم قابىلدادى.

بۇرىنعى باس باپكەر يليا يلين، سۆەتلانا پودوبەدوۆا، زۋلفيا چينشانلو، مايا مانەزا جانە نيدجات راحيموۆتارعا دوپينگ بەردى دەگەن ايىپ تاعىلدى. ITA-نىڭ سوڭعى شەشىمى وسىنداي بولدى.

سول ۋاقىتتا قۇرامادا اعا باپكەر قىزمەتىن اتقارعان الەكسەي نيدىڭ باۋىرى ۆيكتور ءتورت جىلعا سپورتتان شەتتەتىلەدى.

ەسكە سالايىق، قازاقستان دوپينگ داۋىنان كەيىن 6 التىن مەدالدەن ايىرىلعان بولاتىن. جازا تاعايىندالعان ني بولسا، قازاقستان قۇراماسىن 1994-پەن 2016 -جىلدار ارالىعىندا جاتتىقتىردى. ول ريو وليمپياداسىنان كەيىن جۇمىسىنان بوساتىلدى.