ايماق جۇرتشىلىعىنىڭ مۇڭ- مۇقتاجى ءماسليحات دەپۋتاتتارىنىڭ ءجىتى نازارىندا بولۋى ءتيىس - پرەزيدەنت

استانا. KAZINFORM - مەملەكەت باسشىسى قاسىم-جومارت توقايەۆ ەلوردادا ءماسليحات دەپۋتاتتارىنىڭ Ⅱ رەسپۋبليكالىق فورۋمىندا ءسوز سويلەدى.

«دەپۋتاتتار-وزەكتى ماسەلەلەردى اشىق ايتا بىلەتىن، ازاماتتاردىڭ قوعامداعى وي- پىكىرىن اتقارۋشى بيلىككە تىكەلەي جەتكىزەتىن قاۋىم. ءبىر سوزبەن ايتساق، دەپۋتات بولۋ -حالىقتىڭ ءۇنى بولۋ دەگەن ءسوز. مىسالى، جاڭا عانا ءسوز سويلەگەن ازاماتتار وتە ماڭىزدى ماسەلەلەردى كوتەردى. اسەت ماحامبەتوۆتىڭ بىلىكتى مامان رەتىندە اتوم ەنەرگياسى تۋرالى پىكىرى وزەكتى. سىرىمبەك سارسەمبايەۆ مونوقالالاردى دامىتۋ جونىندە جاقسى ۇسىنىستار ايتتى. رينات زايىتوۆتىڭ ۇلتتىق ونەردى قولداۋ تۋرالى پايىمدارى دا ورىندى. دەپۋتاتتار يۋليا كۋچينسكايا جانە ەۆگەني بۋسلايەۆ تا وتە وزەكتى پىكىرلەرىن ايتتى»، - دەدى پرەزيدەنت.

مەملەكەت باسشىسى ءماسليحات - مەملەكەتتىك بيلىكتىڭ وتە ماڭىزدى تارماعى ەكەنىن ەرەكشە اتاپ ءوتتى.

«ايماق جۇرتشىلىعىنىڭ تىنىس-تىرشىلىگى، مۇڭ- مۇقتاجى قاشاندا ءماسليحات دەپۋتاتتارىنىڭ ءجىتى نازارىندا بولۋعا ءتيىس. سايلاۋشىلاردىڭ مۇددەسىن قورعاپ، ەل ءۇمىتىن اقتاۋ - باستى پارىز. مەن ءماسليحاتتاردىڭ قىزمەتىنە ەرەكشە ءمان بەرەمىن. جالپى، ەلىمىزدە 3300 دەن استام ءماسليحات دەپۋتاتى بار. سونىڭ 70 پايىزىنا جۋىعى وسى زالدا وتىر. ءبىز بۇگىن ءماسليحاتتاردىڭ جۇمىسىنا جانە ماڭىزدى ماسەلەلەرگە قاتىستى پىكىر الماسامىز»، - دەدى ق. توقايەۆ.