ايماعامبەتوۆ: جاڭا قۇرىلىس كودەكسىنىڭ جوباسىنان اسا ماڭىزدى نورمالار الىنعان

استانا. KAZINFORM - ءماجىلىس دەپۋتاتى اسحات ايماعامبەتوۆ جاڭا قۇرىلىس كودەكسىنىڭ جوباسىنان مەكتەپ پەن بالاباقشالارعا قاتىستى ماڭىزدى نورمالار الىنىپ قالعانىن ءمالىم ەتتى.

- مەكتەپتەر مەن بالاباقشالار قۇرىلىستان كەيىن ەمەس، قۇرىلىسپەن بىرگە پايدا بولۋ كەرەك. بىلتىر وسى جەردە ءبارىمىز بىرگە كوپپاتەرلى ۇيلەردى مەكتەپ پەن بالاباقشاسىز، ەمحاناسىز سالۋعا تىيىم سالاتىن زاڭ قابىلداعان ەدىك. بۇل نورما ەندى جۇمىس ىستەي باستاعان. نەگە ەكەنى بەلگىسىز، قۇرىلىس كودەكسىنىڭ جوباسىندا ول نورما جوق بولىپ شىقتى. نەلىكتەن، بۇل كىمگە ءتيىمدى؟ ون مىڭداعان وتباسى كوشىپ كەلىپ جاتىر، ال بالالارىن وقىتاتىن مەكتەپ جوق. ءبىز شاعىن اۋداندا مەكتەپ پەن بالاباقشا، ەمحانا جوق بولسا، كوپپاتەرلى ءۇي سالۋعا جول جوق ەكەنىن ايقىن بەكىتەيىك دەپ ۇسىندىق، - دەدى ول.

ءمينيستردىڭ سوزىنشە، بالالار قاۋىپسىزدىگىنە ارنالعان نورما دا جاڭا كودەكسكە ەنبەي قالۋى مۇمكىن.

- بالا قاۋىپسىزدىگى ۇنەم كوزى ەمەس. بىلتىر وسى جەردە بۇكىل الەۋمەتتىك نىساندار مەن كوپقاباتتى ۇيلەردىڭ تەرەزەلەرىندە قاۋىپسىزدىك قۇلپى بولۋ كەرەك دەگەن نورما قابىلدادىق. ويتكەنى جىل سايىن جۇزدەگەن بالا تەرەزەدەن قۇلاپ ءولىپ جاتىر. تاعى دا سول… كودەكس جوباسىن اشىپ قاراسام، ول نورما دا ءتۇسىپ قالعان. نەگە؟ ءيا، بالكىم ول قىمبات بولاتىن شىعار، قۇرىلىس كومپانياسىنا ءتيىمسىز شىعار. ءبىراق بالا ومىرىنەن قىمبات دۇنيە بار ما، ايتىڭىزشى، - دەدى دەپۋتات.

سونداي-اق، ول قۇرىلىس جوبالاعان كەزدە گەولوگيالىق بارلاۋ جۇمىستارى بەيبەرەكەت جۇرگىزىلەتىنىن سىنادى.

- گەولوگيالىق بارلاۋ سالاسىندا جابايى ساۋدا قالىپتاسقانىنان باستايىن. باسقالاي ايتۋ مۇمكىن ەمەس. ماماندار گەولوگيالىق قورىتىندىنى قۇرىلىس ورنىنا بارماي- اق ساتىپ الۋعا بولاتىنىن ايتادى. ءتىپتى كەيبىرەۋلەر ماڭايداعى 100 مەتر جەردىڭ ەسكى دەرەكتەرىن تاۋىپ، سونى كوشىرىپ قۇجاتقا ەنگىزە سالادى ەكەن. ءىس ءبىتتى. قاعازدا ءبارى ادەمى، ال شىن ومىردە عيمارات شىتىناپ، قيراپ جاتادى، - دەدى ءماجىلىس وكىلى.

اسحات ايماعامبەتوۆ مەكتەپ پەن بالاباقشاعا دەپ بولىنگەن تەلىمدەرگە ۋاقىت وزدىرىپ بارىپ تۇنگى كلۋبتار سالىنىپ جاتقانىن ايتادى.

- مەكتەپ اپاتتى دەپ تانىلسا، ورنىنا ءۇي سالىپ، جاڭا مەكتەپتى شەتكەرى اۋدانعا ىسىرا سالعان جاعدايلار دا بار. ءبىز ماڭايىندا بالاما نىسان بولماسا، الەۋمەتتىك نىسان قۇرىلىسىنا بولىنگەن جەردىڭ پايدالانۋ ماقساتىن وزگەرتۋگە تىيىم سالۋدى ۇسىنعانبىز، - دەدى ول.

دەپۋتات الەۋمەتتىك نىسان سالۋعا مىندەتتەمە الاتىن مەموراندۋمدار ءىس جۇزىندە جەمقورلىقتىڭ ءبىر ارناسىنا اينالعانىن ءمالىم ەتتى.

- زاڭ شارشى مەترلەر مەن قۇرىلىس كومپانيالارىن، قالتالىلاردى ەمەس، قاراپايىم ازاماتتاردى ءبىرىنشى قورعاۋ كەرەك، - دەدى دەپۋتات.

ايتا كەتەيىك، ءدال قازىر ءماجىلىس قۇرىلىس قىزمەتىن قاعازباستىلىقتان ارىلتاتىن قۇجاتتى قاراپ جاتىر.