ايەلدەر كۇرەسىنەن ۇلتتىق قۇرامانىڭ باس باپكەرى تاعايىندالدى

استانا. KAZINFORM - نۇرسۇلتان تەمىروۆ ايەلدەر كۇرەسىنەن قازاقستان ۇلتتىق قۇراماسىنىڭ باس جاتتىقتىرۋشىسى قىزمەتىنە تاعايىندالدى.

قازاقستان كۇرەس فەدەراتسياسىنان ءمالىم ەتكەنىندەي، نۇرسۇلتان تەمىروۆ ەڭبەك جولىن 2014-جىلى باستادى.

ءار جىلدارى جاس وسپىرىمدەر جانە جاستار قۇراماسىنىڭ، سونىمەن قاتار ۇلتتىق قۇرامانىڭ اعا جاتتىقتىرۋشىسى قىزمەتىن اتقارعان. ءۇش جىل بويى ايەلدەر كۇرەسىنەن مەملەكەتتىك جاتتىقتىرۋشى بولىپ ەڭبەكتەندى.

ق ر ەڭبەك سىڭىرگەن جاتتىقتىرۋشىسى نۇرسۇلتان تەمىروۆ - الەم چەمپيوناتىنىڭ 4 دۇركىن جۇلدەگەرى ءجاميلا باقبەرگەنوۆا جانە باسقا سپورتشىلاردىڭ جەكە باپكەرى.

ەسكە سالا كەتەيىك، بۇدان بۇرىن ءجاميلا باقبەرگەنوۆانىڭ رەسەيدەگى حالىقارالىق تۋرنيردە توپ جارعانىن جازعان ەدىك.