اۋىلعا باراتىن دارىگەرلەر مەملەكەتتەن قانداي تولەمدەر الادى

استانا. KAZINFORM – ق ر د س م انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا انا مەن بالانىڭ دەنساۋلىعىن ساقتاۋ جانە ماماندارمەن قامتۋ شارالارى تۋرالى ايتىپ بەردى.

«بۇگىنگى تاڭدا ەلىمىزدە 5 مىڭنان استام اكۋشەر-گينەكولوگ (ونىڭ ىشىندە اۋىلدا - 792) جانە 9 مىڭنان استام اكۋشەر (اۋىلدا - 3358) جۇمىس ىستەيدى، ولار جىل سايىن 400 مىڭعا جۋىق جۇكتى ايەلدى قاداعالاپ، بوساندىرادى»، - دەدى م. ەمبەرگەنوۆا ورتالىق كوممۋنيكاتسيالار قىزمەتىندە.

بالالارعا مەديتسينالىق كومەك كورسەتۋ ءۇشىن 4 مىڭنان استام بالالار دارىگەرى جانە مىڭنان استام نەوناتولوگ قىزمەت ەتەدى.

كادرلىق الەۋەتتى نىعايتۋ ءۇشىن مينيسترلىك سوڭعى ەكى جىلدا ماقساتتى گرانتتاردى ەكى ەسەگە ۇلعايتتى.

اۋىلدىق جەرلەرگە مەديتسينا ماماندارىن تارتۋ ءۇشىن الەۋمەتتىك تولەمدەردىڭ ءبىرىڭعاي پاكەتى ازىرلەندى. اۋىلدىق جەرلەردە جۇمىسقا كىرىسكەن جاس ماماندار كوتەرمەاقى، ەڭ تومەنگى پايىزدىق مولشەرلەمەمەن تۇرعىن ۇيگە نەسيە جانە جالاقىعا قوسىمشا تولەمدەر الادى.

«2024 -جىلعى قاڭتاردان باستاپ اۋدان ورتالىقتارىنا جۇمىسقا كەلگەن ماماندارعا ارنالعان بيۋدجەتتىك كرەديت 2500 ا ە ك- كە دەيىن (9,2 ميلليون تەڭگە)، ال اۋىلدىق ەلدى مەكەندەر ءۇشىن 2000 ا ە ك- كە (7,3 ميلليون تەڭگە) دەيىن ءوستى. بۇدان بولەك، 2024-جىلعى ساۋىردە مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى، وعان سايكەس اۋىلدىق جەرلەرگە جۇمىسقا كەلگەن، تاپشى ماماندىقتار بويىنشا مەديتسينالىق قىزمەتكەرلەرگە 100 ا ە ك (2024 -جىلعا 8,5 ميلليون تەڭگە) تولەنەدى»، - دەدى دەپارتامەنت ديرەكتورى.

ايتا كەتەيىك، بيىلعى جىلدىڭ 8 ايلىق قورىتىندىسى بويىنشا ەلىمىزدە 275 مىڭ نارەستە دۇنيەگە كەلگەن.

وسىعان دەيىن اتىراۋ دارىگەرلەرىنىڭ اۋىر پنيەۆمونياعا شالدىققان نارەستەنى امان الىپ قالعانى تۋرالى جازدىق.

اۆتور

ايجان سەرىكجان قىزى