قازاقستاننىڭ مىڭنان استام اۋىلىنىڭ تۇرعىندارى سەكۋندىنا كەمىندە 100 مەگابيت جىلدامدىقپەن ينتەرنەتكە قول جەتكىزۋى مۇمكىن. ول ءۇشىن جەرگىلىكتى بايلانىس وپەراتورلارىنا «قازاقتەلەكومنىڭ» ماگيسترالدىق جەلىلەرىنە قوسىلۋعا مۇمكىندىك بەرىلەدى. بۇل تۋرالى جاساندى ينتەللەكت جانە سيفرلىق دامۋ مينيسترلىگىمەن جاسالعان مەموراندۋمدا كوزدەلگەن.
اۋىلدىق جەرلەردەگى ينتەرنەت بايلانىسىن دامىتۋ مەملەكەت باسشىسى قاسىم-جومارت توقايەۆتىڭ 28-قازانداعى جولداۋىندا قويعان مىندەتتەرىمەن تىكەلەي بايلانىستى.
پرەزيدەنت سيفرلىق ەكونوميكانى دامىتۋ ءۇشىن ازاماتتاردىڭ مۇمكىندىكتەرى ولاردىڭ قاي جەردە تۇراتىنىنا تاۋەلدى بولماۋى كەرەكتىگىن اتاپ وتكەن بولاتىن.
اۋىلدارعا جوعارى جىلدامدىقتى ينتەرنەت قالاي جەتكىزىلەدى؟
كوپتەگەن ەلدى مەكەنگە ماگيسترالدىق بايلانىس جەلىلەرى تارتىلعان. الايدا تۇرعىنداردى ينتەرنەتكە قوسۋ ءۇشىن قوسىمشا ينفراقۇرىلىم قاجەت. بۇل - ماگيسترالدىق جەلىدەن سوڭعى پايدالانۋشىعا دەيىنگى ارالىقتى قامتيتىن «سوڭعى ميليا» دەپ اتالاتىن جەلى بولىگى.
تەلەكوممۋنيكاتسيالار كوميتەتىنىڭ ءتوراعاسى دامير سەيسەمبەكوۆتىڭ ايتۋىنشا، «اۋىلدىق ەلدى مەكەندەرگە ارنالعان تالشىقتى- وپتيكالىق بايلانىس جەلىسى 1.0» جوباسى اياسىندا ماگيسترالدىق ينفراقۇرىلىمدى 2018-2020 -جىلدارى «قازاقتەلەكوم» مەن «ترانستەلەكوم» كومپانيالارى سالعان.
ەندى وسى جەلىلەرگە شاعىن جەرگىلىكتى بايلانىس وپەراتورلارىنىڭ قولجەتىمدىلىگىن قامتاماسىز ەتۋ جوسپارلانىپ وتىر.
بۇگىندە «قازاقتەلەكوم» كومپانياسىنىڭ جەرگىلىكتى شاعىن جانە ورتا بايلانىس وپەراتورلارىنا ءوزىنىڭ ماگيسترالدىق ينفراقۇرىلىمىنا قول جەتكىزۋ مۇمكىندىگىن بەرۋ جونىندە كەلىسىمگە كەلدىك. بۇل ولارعا اۋىلدىق ەلدى مەكەندەردە سەكۋندىنا كەمىندە 100 مبيت جىلدامدىقتاعى GPON تەحنولوگياسى بويىنشا «سوڭعى ميليا» جەلىلەرىن جەدەل تارتۋعا مۇمكىندىك بەرەدى، - دەدى دامير سەيسەمبەكوۆ.
GPON - دەرەكتەردى جوعارى جىلدامدىقپەن جەتكىزۋگە مۇمكىندىك بەرەتىن تالشىقتى- وپتيكالىق بايلانىس تەحنولوگياسى.
«قازاقستاننىڭ ينكليۋزيۆتى ەكونوميكاسىن جەدەل سيفرلاندىرۋ» جوباسى اياسىندا مۇنداي جەلىلەردى مىڭنان استام اۋىلدا سالۋ جوسپارلانىپ وتىر.
اۋىل تۇرعىندارى ءۇشىن قانداي مۇمكىندىك تۋادى؟
اۋىلدىق وتباسىلار ءۇشىن جوعارى جىلدامدىقتى ينتەرنەت قاشىقتان ءبىلىم الۋعا، مەملەكەتتىك قىزمەتتەردى ونلاين پايدالانۋعا جانە قاشىقتان جۇمىس ىستەۋگە كەڭىنەن جول اشادى. ال كاسىپكەرلەرگە ساۋدانى دامىتۋعا جانە سيفرلىق سەرۆيستەردى بەلسەندى پايدالانۋعا مۇمكىندىك بەرەدى.
«قازاقتەلەكوم» كومپانياسىنىڭ كورپوراتيۆتىك بيزنەس جونىندەگى ديۆيزيونىنىڭ باس ديرەكتورى اسقار قايروۆ ساپالى بايلانىس ءوڭىر تۇرعىندارىنىڭ مۇمكىندىكتەرىنە تىكەلەي اسەر ەتەتىنىن اتاپ ءوتتى.
اۋىلدىق ەلدى مەكەندەردىڭ تۇرعىندارى دا ءىرى قالالارداعى ازاماتتار سياقتى ءبىلىم الۋعا، جۇمىس ىستەۋگە جانە كاسىپكەرلىكپەن اينالىسۋعا بىردەي مۇمكىندىككە يە بولعانى ءبىز ءۇشىن ماڭىزدى، - دەدى ول.
قول قويىلعان مەموراندۋم مينيسترلىك پەن «قازاقتەلەكوم» كومپانياسىنىڭ بىرلەسكەن جۇمىسىنىڭ نەگىزگى باعىتتارىن ايقىندايدى.
كەلەسى كەزەڭدە جەرگىلىكتى بايلانىس جەلىلەرىن دامىتۋ جۇمىستارى جۇرگىزىلەدى. سونىڭ ناتيجەسىندە ينتەرنەت اۋىل تۇرعىندارىنىڭ ۇيلەرىنە دەيىن جەتكىزىلمەك.