اۋىل تۇرعىندارىنا «تاۋار نەسيەسىن» بەرۋ ماسەلەسىن قاراستىرىلادى - جولداۋ

استانا. KAZINFORM - مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا كەيبىر جەر يەلەنۋشىلەر تەلىم ورنالاسقان ەلدى مەكەنگە قامقورلىق جاسامايتىنىن سىنادى.

«كوپتەگەن مەنشىك يەسى وزدەرى پايداسىن كورىپ وتىرعان جەردەن مىڭداعان شاقىرىم الىستا تۇرادى، ونداعى اۋىل تۇرعىندارىنا قامقورلىق جاساۋ ويىنا كىرىپ تە شىقپايدى. بىزگە مۇنداي جەر يەلەرىنىڭ قاجەتى جوق. ۇكىمەت پەن باس پروكۋراتۋرا ولارعا قاتىستى ماسەلەنى مىقتاپ قولعا الۋعا ءتيىس. ازاماتتار، اسىرەسە، اۋىل تۇرعىندارى زاڭدى تۇردە تابىستى جۇمىس ىستەپ، بولاشاعىنىڭ قامىن ءوزى ويلاۋى كەرەك. ولاردى وسىعان ىنتالاندىرۋ - مەملەكەتتىڭ باستى مىندەتتەرىنىڭ ءبىرى»، - دەدى قاسىم-جومارت توقايەۆ.

مەملەكەت باسشىسى بىلتىر باستالعان «اۋىل اماناتى» جوباسى ناتيجەسىنە «جامان ەمەس» دەگەن باعا بەردى.

«ەندى وسى جوبا اياسىندا تاعى ءبىر جاڭا ءتاسىلدى، ياعني «تاۋار نەسيەسىن» بەرۋ ماسەلەسىن قاراستىرۋ قاجەت. اۋىل تۇرعىندارىنا ءوز ونىمدەرىن وڭدەۋگە جانە ساتۋعا مۇمكىندىك بەرەتىن ينفراقۇرىلىم قۇرۋ وتە ماڭىزدى. ءار اۋداندا ازاماتتارعا ءتۇرلى اۋىل شارۋاشىلىعى داقىلدارىن ءوسىرۋدى ۇيرەتەتىن ورتالىق اشۋ قاجەت. وسىنداي جوبا «Amanat» پارتياسىنىڭ باستاماسىمەن جامبىل وبلىسى مەركى اۋدانىندا جۇزەگە اسىرىلدى. ۇكىمەت پەن اكىمدەر بۇل تاجىريبەنى باسقا دا ايماقتارعا تاراتۋدى ويلاستىرۋى كەرەك. جالپى وتاندىق بيزنەسكە جانە شەتەل ينۆەستورلارىنا جول اشۋ - ۇكىمەت پەن بارلىق مەملەكەتتىك ورگاننىڭ مىندەتى. ال ولاردىڭ، ياعني بيزنەستىڭ جانە ينۆەستورلاردىڭ زاڭدى قىزمەتىنە كەدەرگى جاساۋ اسا اۋىر قۇقىق بۇزۋشىلىق دەپ سانالۋعا ءتيىس. دەمەك ونداي ارەكەتكە جول بەرگەندەر ءتيىستى جازاسىن الادى. مەن بۇل تۋرالى ۇنەمى ايتىپ ءجۇرمىن. ال كاسىپكەرلەر مەن ينۆەستورلار ءوز جۇمىسىن ادال جۇرگىزىپ، زاڭدى ساقتاپ، سالىق تولەۋدەن جالتارماۋى كەرەك»، - دەدى پرەزيدەنت.

اۆتور
ەسىمجان ناقتىباي