اۋىل تۇرعىندارىنا ارنالعان يپوتەكالىق باعدارلاما ازىرلەۋ ۇسىنىلدى

استانا. KAZINFORM - ءماجىلىس دەپۋتاتى ەرلان سايىروۆ ۇكىمەتكە اۋىل، اۋدان تۇرعىندارى ءۇشىن تومەندەتىلگەن مولشەرلەمەسى %5- عا دەيىن جانە ەڭ تومەنگى باستاپقى جارناسى %10- دان باستالاتىن جەڭىل يپوتەكالىق باعدارلاما ازىرلەۋدى ۇسىندى.

- قازاقستان حالقىنا جولداۋىندا پرەزيدەنت قاسىم-جومارت توقايەۆ «وتباسى بانكتىڭ قىزمەتىن قايتا قاراۋ كەرەكتىگىن ايتىپ، باستى نازاردى وبلىس ورتالىقتارىنا ەمەس، اۋداندارعا، مونوقالالارعا جانە اۋىلدارعا اۋدارعان ءجون» دەپ ناقتى باعدار بەردى. بۇگىندە اۋىلداردا، اۋداندار مەن مونوقالالاردا 8,7 ميلليون ادام تۇرادى، بۇل قازاقستان حالقىنىڭ C- ىن قۇرايدى. ال تۇرعىن ۇيمەن قامتاماسىز ەتۋ دەڭگەيى قالالاردا 26,9 شارشى مەتر بولسا، اۋىلداردا ءبىر ادامعا شاققاندا نەبارى 20,7 شارشى مەتر، - دەدى ەرلان سايىروۆ ۇكىمەت باسشىسىنىڭ ورىنباسارى سەرىك جۇمانعاريننىڭ اتىنا دەپۋتاتتىق ساۋال جولداي وتىرىپ.

حالىق قالاۋلىسى كەلتىرگەن مالىمەتكە سۇيەنسەك، جىل باسىندا اۋىلداردا 9 مىڭنان استام ادام تۇراتىن 1200 اۆاريالىق ءۇي، مونوقالالاردا 2,3 مىڭ ادام تۇراتىن 76 اۆاريالىق ءۇي بولدى. 2022-2024 -جىلدارى جاڭا تۇرعىن ءۇيدىڭ تەك - ى اۋىلدىق جەرلەردە پايدالانۋعا بەرىلدى.

- مۇنداي ديسپروپورتسيا، ەڭ الدىمەن، اۋىل تۇرعىندارى ءۇشىن يپوتەكالىق، وتباسى بانكى ونىمدەرىنىڭ قولجەتىمسىزدىگىمەن جانە حالىقتىڭ حاباردار بولۋى دەڭگەيىنىڭ تومەن بولۋىنا بايلانىستى. وتباسى بانكتىڭ كونسۋلتاتسيالىق ورتالىقتارى تەك 4 مونوقالادا جانە 5 شاعىن قالادا جۇمىس ىستەيدى، اۋىلدار مەن اۋدانداردىڭ كوپ بولىگىندە مۇلدەم جۇمىس ىستەمەيدى. بىلتىر وتباسى بانكى باستاپقى جانە قايتالاما تۇرعىن ءۇي ساتىپ الۋعا، سونداي-اق اۋىلداردا جەكە تۇرعىن ۇيلەر سالۋعا قولجەتىمدى قارجىلاندىرۋدى ۇسىناتىن «اسىل مەكەن» پيلوتتىق باعدارلاماسىن ىسكە قوستى، - دەدى ەرلان سايىروۆ.

ونىڭ مالىمدەۋىنشە، وتباسى بانكى جوعارىدا اتالعان پيلوتتىق باعدارلامانى ىسكە اسىرۋعا ءوز قاراجاتىنان 2 ميلليارد تەڭگە ءبولدى. «وتاۋ» جانە «ناۋرىز» باعدارلامالارى بويىنشا كەزەكتە تۇرعاندار مەن ءوتىنىش بەرۋشىلەرگە قاتىسۋعا باسىمدىق بەرىلدى. قارىزدىڭ ەڭ جوعارى سوماسى 10 ميلليون تەڭگەنى قۇرايدى. الايدا باعدارلاما تيىمدىلىگى بولعانىنا قاراماستان جالعاسىن تاپپاي، قارجىلاندىرۋ توقتاتىلدى.

وسىلايشا ءماجىلىس دەپۋتاتى ۇكىمەت كەلەسى شارالاردى قابىلداۋى قاجەت دەپ ەسەپتەيدى:

1. «اسىل مەكەن» باعدارلاماسىن قارجىلاندىرۋدى ۇلعايتۋ. شاعىن قالالاردى قامتي وتىرىپ، باعدارلامانىڭ بۇكىل ەل اۋماعىندا تۇراقتى ىسكە اسىرىلۋىن قامتاماسىز ەتىپ، رەسپۋبليكالىق بيۋدجەتتەن جىل سايىن قاراجات ءبولۋدى كوزدەۋ؛

2. اۋىلعا بەيىمدەلگەن يپوتەكالىق ونىمدەردى ازىرلەۋ. اۋىلدار، مونوقالالار جانە شاعىن قالالار تۇرعىندارى ءۇشىن تومەندەتىلگەن مولشەرلەمەسى %5- عا دەيىن جانە ەڭ تومەنگى باستاپقى جارناسى - دان باستاپ جەڭىلدىكتى يپوتەكالىق ونىمدەر جاساۋ. حالىقتىڭ الەۋمەتتىك جاعىنان وسال ساناتتار ءۇشىن مولشەرلەمەلەردى سۋبسيديالاۋدى قامتاماسىز ەتۋ؛

3. جەرگىلىكتى اتقارۋشى ورگاندارمەن ۇيلەستىرۋدى كۇشەيتۋ. شىعىس قازاقستان وبلىسىنداعى «ءبىر قاباتتى شىعىس» جانە جەتىسۋ وبلىسىنداعى «جەرۇيىق» جوبالارىنىڭ تابىستى تاجىريبەسىن پايدالانا وتىرىپ، باعدارلامالاردى بىرلەسىپ ىسكە اسىرۋ ءۇشىن اكىمدىكتەرمەن كەلىسىمدەر جاساسۋ؛

4. وتباسى بانكى كونسۋلتاتسيالىق جانە اقپاراتتىق سەرۆيستەرىنىڭ گەوگرافياسىن كەڭەيتۋ. ءار اۋداندا قىزمەت كورسەتۋ ورتالىقتارىن اشۋ، موبيلدى وفيستەر اشۋ، بۇكىل ەل بويىنشا اقپاراتتىق-اعارتۋ ناۋقاندارىن باستاۋ. وتباسى بانكتىڭ قىزمەتىن قايتا قاراۋ قازاقستاننىڭ ادىلەتتى، تەڭگەرىمدى جانە قول جەتىمدى بولاشاعىنا جاسالعان قادام.

بۇعان دەيىن ءماجىلىس دەپۋتاتى نارتاي سارسەنعالييەۆ حالىقتى جۇمىسپەن قامتۋعا بولىنگەن قاراجات ماقساتسىز جۇمسالىپ جاتقانىن ايتىپ، ۇكىمەتكە دابىل قاقتى.

اۆتور

داۋلەت ىزتىلەۋ