اۋىل شارۋاشىلىعىنا بولىنەتىن سۋبسيديانىڭ تيىمدىلىگى تەكسەرەلەدى - ءاليحان سمايىلوۆ

استانا. KAZINFORM - جوعارى اۋديتورلىق پالاتانىڭ ءتوراعاسى ءاليحان سمايىلوۆ كۆازيمەملەكەتتىك سەكتوردى تەكسەرۋگە قاتىستى پىكىر ايتتى.

ونىڭ سوزىنە قاراعاندا، بيىل مەملەكەتتىك اۋديت جۇمىسىنىڭ تيىمدىلىگى ەداۋىر كوتەرىلدى.

«30 جەكە ادام مەن 16 زاڭدى تۇلعا اكىمشىلىك جاۋاپكەرشىلىككە، ال 173 ادام تارتىپتىك جازاعا تارتىلدى. سونىمەن قاتار، 12 ماتەريال قۇقىق قورعاۋ ورگاندارىنا جولداندى. جىلدىڭ سوڭىنا دەيىن ءبىرقاتار اۋديتورلىق جۇمىس جالعاسادى. ونىڭ اراسىندا اۋىل شارۋاشىلىعىنا بولىنەتىن سۋبسيديانىڭ تيىمدىلىگى تەكسەرەلەدى. بۇدان بولەك، كولەڭكەلى ەكونوميكاعا قارسى ءىس-قيمىلدىڭ تيىمدىلىگىنە اۋديت جاسالىپ وتىر. ۇلتتىق ۇلان مەن وعان باعىنىستى ۇيىمداردىڭ جۇمىسىنا دا اۋديت جۇرگىزىلىپ جاتىر»، - دەدى جوعارى اۋديتورلىق پالاتا ءتوراعاسى پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ءا. سمايىلوۆ كۆازيمەملەكەتتىك سەكتور دا اۋديتپەن قامتىلعانىن ايتتى.

«قازمۇنايگاز» جانە «بايتەرەككە» قاتىستى اۋديت جالعاسىپ جاتىر. بۇل جۇمىستى كەلەر جىلدىڭ ءبىرىنشى توقسانىندا اياقتايمىز. ونىڭ قورىتىندىسىن جاريالايمىز، سونداي-اق پارلامەنتتىڭ قاراۋىنا ۇسىنامىز»، - دەدى ول.

ونىڭ سوزىنە قاراعاندا، 9 ايدىڭ قورىتىندىسى بويىنشا 18 اۋديتورلىق ءىس-شارا اياقتالدى.

«بۇل رەتتە 9 تريلليون تەڭگەدەن استام قاراجات قامتىلدى. وسى جۇمىستىڭ اياسىندا 640 ميلليارد تەڭگە سوماسىندا زاڭناما تالاپتارىن بۇزۋدىڭ ءتۇرلى دەرەگىن انىقتادىق. سونىڭ ىشىندە اكتيۆتەردى جانە قاراجاتتى ءتيىمسىز پايدالانۋعا قاتىستى 318 ميلليارد تەڭگەنى ەسەپتەدىك. قارجى سالاسىنداعى زاڭناما تالاپتارىن بۇزۋ تۇرعىسىندا 133 ميلليارد تەڭگە جانە ءتيىمسىز جوسپارلاۋ بويىنشا 187 ميلليارد تەڭگە انىقتالدى. بۇل جۇمىستاردىڭ ناتيجەسىندە 115 تەڭگە رەسپۋبليكالىق بيۋجەتكە وتەلدى. بىلتىر وسى كورسەتكىش تەك 5 ميلليارد تەڭگەنى قۇراعان ەدى»، - دەدى ءا. سمايىلوۆ.