«اۋىل اماناتى» باعدارلاماسىنا قاتىسۋعا ءوتىنىم بەرۋ جەڭىلدەيدى

استانا. KAZINFORM - «اۋىل اماناتى» باعدارلاماسىنا قاتىسۋعا نيەت بىلدىرگەن ازاماتتار ءۇشىن ەلەكتروندى اقپاراتتىق جۇيە ازىرلەنىپ جاتىر.

پورتال جەڭىلدەتىلگەن نەسيە الىپ، كاسىپ اشۋدى كوزدەگەن ادامعا ءتيىستى ءوتىنىمدى ۇيدەن شىقپاي-اق، قاشىقتان بەرۋگە مۇمكىندىك بەرىپ وتىر. جۇيە جوباسى ق ر پرەمەر- ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە تانىستىرىلدى. بۇل تۋرالى Primeminister.kz. جازدى.

اۋىل تۇرعىندارىنىڭ تابىسىن ارتتىرۋعا باعىتتالعان باعدارلاماعا قاتىسۋشىلارعا جەڭىلدەتىلگەن نەسيە بەرۋ ءۇردىسىن وڭىرلەردەگى الەۋمەتتىك-كاسىپكەرلىك كورپوراتسيالار ۇيلەستىرىپ وتىر. ولاردىڭ كەڭسەلەرى وبلىس ورتالىقتارىندا ورنالاسقان. بۇل رەتتە شالعاي جاتقان اۋىلداردان كەلىپ، ءوتىنىم بەرۋ ىڭعايسىزدىق تۋدىرادى. اۋىل شارۋاشىلىعى ۆيتسە-ءمينيسترى باعلان بەكباۋوۆتىڭ سوزىنشە، ازىرلەنىپ جاتقان پورتال ءوتىنىمدى قابىلداپ قانا قويماي ونىڭ قاراستىرۋ كەزەڭدەرىن قاشىقتان باقىلاپ وتىرۋعا مۇمكىندىك بەرمەك.

«ءوتىنىم بەرۋشى جۇيەگە ەلەكتروندى قولتاڭباسى ارقىلى تىركەلىپ، باعدارلاماعا قاتىسۋعا قاجەتتى مالىمەتتەر مەن قۇجاتتاردى جۇكتەيدى. قولدانۋشىنىڭ رۇقساتىمەن ونىڭ جەكە دەرەكتەرى تەكسەرىلىپ، بازالاردا بار كەي مالىمەتتەر اۆتوماتتى تۇردە ەنگىزىلەدى. الەۋمەتتىك- كاسىپكەرلىك كورپوراتسيالاردا ءوتىنىم بىرنەشە ساتىدا قاراستىرىلادى. «اۋىل اماناتى» ارقىلى نەسيە الۋعا نيەتتى ازامات جەكە كابينەتى ارقىلى قۇجاتتار ناقتى قاي ماماننىڭ قاراۋىندا تۇرعانىن كورە الادى»، - دەدى باعلان بەكباۋوۆ.

ەلەكتروندى جۇيەنى جامبىل وبلىسىندا پيلوتتىق رەجيمدە ەنگىزۋ كوزدەلىپ وتىر.

«باعدارلاماعا قاتىسۋشىلار ءۇشىن بارىنشا ىڭعايلى جاعداي جاساۋ ماڭىزدى. اقپاراتتىق جۇيەنىڭ وزگە دە قاجەتتى مالىمەتتەر بازالارىمەن ينتەگراتسيالانۋىن ءجىتى قاداعالاۋ كەرەك. ءبىزدىڭ تۇپكىلىكتى ماقساتىمىز اۋىل تۇرعىندارىنىڭ تابىسىن ارتتىرۋ ەكەنىن ەستەن شىعارماۋ قاجەت. سوندىقتان بەرىلەتىن نەسيەلەر اۋىلدارداعى اعايىننىڭ تۇراقتى تابىسقا قول جەتكىزۋىنە ىقپال ەتۋى ءتيىس. «اۋىل اماناتى» باعدارلاماسى ارقىلى كاسىپ اشقان نەمەسە جۇمىسقا ورنالاسقاندار تۋرالى دەرەكتەر ءتيىستى بازالار ارقىلى تەكسەرىلىپ وتىرادى. سوندىقتان ايماقتار باعدارلامانىڭ ناتيجەلى جۇزەگە اسۋىن قاتاڭ باقىلاۋى شارت»، - دەپ اتاپ ءوتتى تامارا دۇيسەنوۆا.