ايدا بالايەۆا: مەملەكەت وتباسى ىسىنە تەك بالانىڭ ومىرىنە قاتەر تونگەن جاعدايدا عانا ارالاسادى
استانا. KAZINFORM - مادەنيەت جانە اقپارات ءمينيسترى ايدا بالايەۆا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قابىلدانعان زاڭدارىنا قاتىستى بەينە ۇندەۋ جاسادى.
مادەنيەت جانە اقپارات ءمينيسترى ايدا بالايەۆا Facebook الەۋمەتتىك جەلىسىندەگى پاراقاشاسىندا زاڭنىڭ ماڭىزدى تۇستارىنا توقتالا كەلە، بالالاردى وتباسىنان اجىراتۋ تۋرالى بىردە-ءبىر نورما جوق ەكەنىن باسا ايتتى.
«وسىعان قاتىستى الىپ-قاشپا اڭگىمەنىڭ ءبارى جالعان»، - دەدى ايدا بالايەۆا بەينە ۇندەۋىندە.
ونىڭ ايتۋىنشا، مەملەكەتتىڭ بۇل باعىتتاعى ساياساتى - وتباسىن ساقتاپ قالۋ، بالانىڭ وتباسىندا ءوسۋىن قامتاماسىز ەتۋ.
«مەملەكەت وتباسى ىسىنە تەك بالانىڭ ءومىرى مەن دەنساۋلىعىنا قاتەر تونگەن جاعدايدا عانا ارالاسىپ، بالا قۇقىعىن قورعايدى. انا مەن بالا ولاردىڭ ادامي قۇقىعى بارشامىز ءۇشىن ەڭ ماڭىزدى باسىمدىق بولۋى شارت»، - دەدى مينيستر.
ەسكە سالا كەتەيىك، بۇگىن پرەزيدەنت ايەل قۇقىعى مەن بالالاردىڭ قاۋىپسىزدىگىن قامتاماسىز ەتەتىن زاڭدارعا قول قويدى.