ايدا بالايەۆا «ءاليا» فيلمىنىڭ ءتۇسىرىلىمى توقتاتىلۋى مۇمكىن ەكەنىن ايتتى

استانا. KAZINFORM - ق ر مادەنيەت جانە اقپارات ءمينيسترى ايدا بالايەۆا Facebook جەلىسىندە اتى اڭىزعا اينالعان مەرگەن ءاليا مولداعۇلوۆاعا ارنالعان «ءاليا» كوركەم فيلمىنىڭ ءتۇسىرىلىمىن توقتاتۋعا قاتىستى پىكىر ءبىلدىردى.

بالايەۆا الدىمەن ءاليا مولداعۇلوۆانىڭ ەرلىگى تاريحىمىزدىڭ اجىراماس بولىگى ەكەنىن، ونىڭ ەرلىگىنە ارنالعان فيلمنىڭ ۇلكەن ەكراندارعا شىعۋىنا مينيسترلىك مۇددەلى ەكەنىن اتاپ ءوتتى.

- «ءاليا» فيلمى ءبىز ءۇشىن باستى فيلمدەردىڭ ءبىرى بولماق. بۇل جالپى بيۋدجەتى 900 ميلليون تەڭگەدەن اساتىن اۋقىمدى جوبا، ونىڭ 450 ميلليون تەڭگەسى جەكە ينۆەستيتسيا، ال قالعان سومانى كينوكومپانيا مەملەكەتتىك بيۋدجەتتەن الۋدى جوسپارلاعان»، - دەپ جازدى ول پوستتا. - وسى جىلدىڭ ماۋسىم ايىندا فيلم ءتۇسىرۋدى جوسپارلاپ وتىرعان ۇجىم ۇلتتىق كينەماتوگرافيانى قولداۋ مەملەكەتتىك ورتالىعى ۇيىمداستىرعان پيتچينگ شاراسىنا قاتىسىپ، مەملەكەتتىك قولداۋعا ءوتىنىش ءبىلدىرىپ، فيلمنىڭ سەناريىن تانىستىردى. ۆەدومستۆوارالىق كوميسسيا وتىرىسىنىڭ قورىتىندىسى بويىنشا 18 جوبا، ونىڭ ىشىندە «ءاليا» فيلمى قارجىلاندىرۋعا ۇسىنىلدى.

مادەنيەت ءمينيسترىنىڭ ايتۋىنشا، كينوكومپانيا مەملەكەت قارجىسىن ىسىراپ ەتپەۋ ءۇشىن بايقاۋعا قاتىسۋدى ۋاقىتشا توقتاتۋ تۋرالى شەشىم قابىلداعان.

- بۇل شەشىمدى قابىلداۋ ءۇشىن جوبانى ىسكە اسىرۋدى كەشىكتىرۋگە تۋرا كەلدى، ويتكەنى ءتۇسىرىلىمنىڭ نەگىزگى بولىگى بەلارۋس رەسپۋبليكاسىنىڭ اۋماعىندا جوسپارلانعان بولاتىن، وندا سوعىس قيمىلدارىنىڭ كورىنىستەرىن ءتۇسىرۋ جوسپارلانعان، - دەپ ءتۇسىندىردى ا. بالايەۆا. - بەلارۋس قازىرگى ۋاقىتتا باسقا جوبالاردىڭ، نەگىزىنەن رەسەيلىك جوبالاردىڭ جوعارى جۇكتەمەسىنە بايلانىستى قاجەتتى تابيعي الاڭداردى ۇسىنا الماي وتىر. سول سەبەپتى تابيعي دەكوراتسيالاردى قولدانۋ كەستەسىن كەلىسۋ مۇمكىن بولمادى، سودان كەيىن مەرزىمدى بۇزۋ جانە جوبانى ۋاقتىلى اياقتاماۋ قاۋپى تۋىندادى. وسىعان بايلانىستى شىعىس قازاقستان وبلىسىنداعى تابيعي الاڭداردى قولدانۋ تۋرالى شەشىم قابىلداندى. بۇل ءتۇسىرىلىم ساپاسىن ساقتاپ قانا قويماي، ۋاقىتىندا بەرىلۋىن قامتاماسىز ەتەدى.

بالايەۆا جوبانى قارجىلاندىرۋدا ەش قيىندىق جوق، ۇجىم فيلمنىڭ ءتۇسىرىلىمىن ۋاقىتىندا اياقتاپ، ۇلكەن ەكراندارعا ۇسىنۋعا بار كۇش-جىگەرىن سالاتىنىنا سەندىردى.

- قازاقستان رەسپۋبليكاسىنىڭ مادەنيەت جانە اقپارات مينيسترلىگى «ءاليا» جوباسىنا جانە ۇلتتىق مۇرانى ساقتاۋعا باعىتتالعان باسقا دا باستامالارعا بارلىق قاجەتتى قولداۋ كورسەتۋدى جالعاستىرادى. «ءاليا مولداعۇلوۆا تۋرالى فيلم ەلىمىزدىڭ مادەني ومىرىندەگى ماڭىزدى وقيعاعا اينالىپ، كەيىپكەرىمىزدىڭ ەرلىگىن لايىقتى تۇردە ماڭگىلىككە قالدىراتىنىنا سەنىمدىمىن»، - دەپ جازدى مينيستر.

اۆتور
ەركەجان سماعۇلوۆا