ايدا بالايەۆا: ەڭبەك ادامدارى - مەملەكەتتىڭ ەڭ باستى قۇندىلىعى
استانا. KAZINFORM - «استانا بالەت» تەاترىندا ق ر مادەنيەت جانە اقپارات ءمينيسترى ايدا بالايەۆا مادەنيەت سالاسىنداعى بەدەلدى حالىقارالىق جاستار بايقاۋلارىنىڭ جەڭىمپازدارىن قۇتتىقتادى. بۇل تۋرالى مينيسترلىكتىڭ باسپا ءسوز قىزمەتى مالىمدەدى.
مينيستر جەڭىمپازداردى قۇتتىقتاي وتىرىپ، ولاردىڭ جەتىستىككە جەتۋىنە اتا-انالارى مەن ۇستازدارىنىڭ ۇلەسى زور ەكەنىن ايرىقشا اتاپ ءوتتى.
«سىزدەرمەن جۇزدەسكەنىمە وتە قۋانىشتىمىن. بۇل كەزدەسۋ رەسپۋبليكا كۇنى قارساڭىندا ءوتۋى ءتيىس ەدى. ءبىراق مەرەكەگە ارنالعان اۋقىمدى ءىس- شارالارعا بايلانىستى بۇگىن عانا جولىعىپ وتىرمىز. ۇلتتىق مەرەكەمىزگە وراي، مەملەكەت باسشىسى جانە ونىڭ اتىنان ءبىز ءتۇرلى سالادا ەڭبەك سىڭىرگەن قىزمەتكەرلەردى، ءتۇرلى ماماندىق يەلەرىن قۇتتىقتادىق. ولاردىڭ قاتارىندا ۇستازدار، دارىگەرلەر، قۇتقارۋشىلار، مادەنيەت قىزمەتكەرلەرى بار»، - دەدى ايدا بالايەۆا.
مينيستر جاس دارىنداردىڭ جەتىستىكتەرى ولاردىڭ ۇستازدارىنىڭ ۇزاق جىلعى تاباندى ەڭبەگىنىڭ ناتيجەسى ەكەنىن ايتتى.
«سىزدەردىڭ جەتىستىكتەرىڭىز - وزدەرىڭىزدىڭ عانا ەمەس، سونداي- اق ۇستازدارىڭىز بەن اتا- انالارىڭىزدىڭ دا قاجىرلى ەڭبەگىنىڭ ناتيجەسى. ەڭبەك ادامدارى - مەملەكەتتىڭ ەڭ باستى قۇندىلىعى. سوندىقتان بۇگىندە ولاردىڭ ەڭبەگى جوعارى دەڭگەيدە مويىندالىپ، قۇرمەتتەلىپ وتىر. سىزدەرگە بالالارىڭىزدى تاربيەلەۋگە جۇمساعان كۇش-جىگەرلەرىڭىز ءۇشىن العىس ايتامىن. بۇگىندە قازاقستاندا ءتۇرلى سالادا، ونىڭ ىشىندە مادەنيەت پەن ونەر سالاسىندا جاستاردى قولداۋعا جانە تالانتىن اشۋعا باعىتتالعان كوپتەگەن باستامالار مەن جوبالار ىسكە اسىپ جاتىر. مەملەكەت باسشىسى ەل بولاشاعى جاستاردىڭ قولىندا ەكەنىن ۇنەمى ايتىپ كەلەدى. سىزدەر ءوز قاتارلاستارىڭىز بەن كەيىنگى ۇرپاققا ۇلگى بولاسىزدار. سىزدەردى الدا ۇلكەن جەڭىستەر كۇتىپ تۇرعانىنا سەنىمدىمىن»، - دەدى مينيستر.
كەزدەسۋ بارىسىندا قاتىسۋشىلار جاس دارىنداردى قولداۋعا جانە ولاردىڭ شىعارماشىلىق الەۋەتىن دامىتۋعا باعىتتالعان مەملەكەتتىك جوبالاردى تالقىلادى.
كەزدەسۋ سوڭىندا ايدا بالايەۆا بايقاۋ جەڭىمپازدارى مەن ولاردىڭ اتا-انالارىنا جانە ۇستازدارىنا حالىقارالىق ارەناداعى ءۇشىن العىس حاتتار مەن ەستەلىك سىيلىقتار تابىستادى.
بۇعان دەيىن مينيستر ءوز كاسىبىن جەتىك مەڭگەرگەن ماماندار ۇلت ساپاسىن ارتتىراتىنىن ايتتى.