ۇلتتىق تەستىلەۋ ورتالىعى ديرەكتورىنىڭ ورىنباسارى ناۋجان ديداربەكوۆانىڭ ايتۋىنشا، تالاپكەرلەر جىل سايىن سمارتفون مەن وزگە دە تىيىم سالىنعان زاتتاردى جاسىرۋدىڭ جاڭا تاسىلدەرىن ويلاپ تابادى.
- بيىل سمارت-كوزىلدىرىكپەن تەستىلەۋگە كىرۋگە ارەكەت جاسالدى. سونداي-اق تەلەفوندى شاشقا ارنالعان رەزەڭكەنىڭ ىشىنە جاسىرىپ اكەلمەك بولعاندار دا كەزدەستى. ەرەكشە جاعدايلاردىڭ ءبىرى - بويى الاسا تالاپكەردىڭ 43 ولشەمدى اياق كيىممەن كەلۋى بولدى. تەكسەرۋ بارىسىندا اياق كيىمنىڭ ىشىنە سمارتفون جاسىرىلعانى انىقتالدى، - دەدى ول ورتالىق كوممۋنيكاتسيالار قىزمەتىندە وتكەن بريفينگتە.
ۇلتتىق تەستىلەۋ ورتالىعى تالاپكەرلەردى اكادەميالىق ادالدىق قاعيدالارىن ساقتاپ، تەستىلەۋگە تىيىم سالىنعان زاتتاردى الىپ كەلمەۋگە شاقىردى.
ەسكە سالايىق، 2026-جىلعى نەگىزگى ۇ ب ت 10-مامىر مەن 10-شىلدە ارالىعىندا ءوتتى. وسى كەزەڭدە تەستىلەۋگە 233 مىڭ تالاپكەر قاتىسىپ، ەكى مۇمكىندىك اياسىندا ەمتيحان 422 مىڭ رەت تاپسىرىلدى.
ۇ ب ت بارىسىندا 890 قۇقىق بۇزۋشىلىق انىقتالدى. سونىڭ ىشىندە سمارتفون، شپارگالكا جانە وزگە دە تىيىم سالىنعان زاتتاردى الىپ وتپەك بولعان 522 تالاپكەر تەست تاپسىرۋ مۇمكىندىگىنەن ايىرىلدى.