ال كەي جاعدايدا تىسكەباسار اعزاعا قوسىمشا دارۋمەندەر، مينەرالدار الۋدىڭ ءبىر جولى سانالادى. دەگەنمەن پايدالى ونىمدەردىڭ ءوزىن مولشەرمەن تۇتىنعان ءجون.
تىسكەباساردىڭ قاي كەزدە زيانى ءتيۋى مۇمكىن؟
تىسكەباساردىڭ ءوزى ينسۋلينگە توزىمدىلىكتىڭ دامۋىنا تىكەلەي سەبەپ بولمايدى. تاماقتانعان كەزدە اعزادا قانداعى گليۋكوزا دەڭگەيىن رەتتەۋگە كومەكتەسەتىن ينسۋلين گورمونى بولىنەدى. الايدا اس ءىشۋ جيىلىگى عانا زات الماسۋ بۇزىلىستارىنىڭ قاۋپىن انىقتامايدى.
اعزاداعى مەتابوليزم ساۋلىعىنا كۇندەلىكتى اس ءمازىرى، دەنە بەلسەندىلىگى، سالماق، تاماقتانۋ ءتارتىبى جانە باسقا دا فاكتورلار اسەر ەتەدى. امەريكالىق جۇرەك قاۋىمداستىعىنىڭ عىلىمي مالىمدەمەسىندە تاماقتانۋ رەجيمىنىڭ تۇراقسىزدىعى جۇرەك پەن زات الماسۋ جۇيەسىنىڭ ساۋلىعىنا كەرى اسەر ەتەتىن كورسەتكىشتەرمەن بايلانىستى بولۋى مۇمكىن ەكەنى ايتىلادى. دەگەنمەن قولدا بار زەرتتەۋلەر ءاربىر قوسىمشا تىسكەباسار ينسۋلينگە توزىمدىلىك ءقاۋپىن وزدىگىنەن ارتتىرادى دەگەن تۇجىرىم جاساۋعا نەگىز بەرمەيدى.
قارنىڭىز اشپاسا دا جيى تاماقتانىپ، قۇنارلىعى جوعارى ونىمدەردى كوپ تۇتىنۋ اعزاعا قاجەتتى مولشەردەن ارتىق ەنەرگيا الۋعا اكەلۋى مۇمكىن. مۇنداي ادەت ۋاقىت وتە سالماق قوسۋعا ىقپال ەتەدى. ال ارتىق سالماق ينسۋلينگە توزىمدىلىكتىڭ دامۋ ءقاۋپىن ارتتىراتىن فاكتورلاردىڭ ءبىرى ەكەنى انىق.
سوندىقتان تىسكەباساردىڭ جيىلىگىنە عانا ەمەس، ونىڭ قۇرامىنا، مولشەرىنە جانە كۇندەلىكتى اس ءمازىرىنىڭ جالپى قۋاتتىلىعىنا دا ءمان بەرگەن دۇرىس.
تىسكەباسار رەتىندە قاي ونىمدەردى تاڭداعان ءجون؟
جەڭىل اسقا كوبىنە وزىمەن بىرگە الىپ جۇرۋگە ىڭعايلى، ارنايى دايىنداۋدى نەمەسە ساقتاۋدىڭ كۇردەلى جاعدايلارىن قاجەت ەتپەيتىن ونىمدەر تاڭدالادى. ولاردىڭ قاتارىندا الما، جاڭعاق پەن كەپتىرىلگەن جەمىستەر بار.
بۇل ونىمدەردىڭ ۇشەۋى دە قۇنارلى اس ءمازىرىنىڭ ءبىر بولىگى بولا الادى. الايدا ولاردىڭ قۋاتتىلىعى، تالشىق مولشەرى جانە توقتىق سەزىمىن ساقتاۋ ەرەكشەلىگى ءارتۇرلى. سوندىقتان تاڭداۋ ادامنىڭ جەكە قاجەتتىلىگىنە، اعزاسىنىڭ ءونىمدى قابىلداۋىنا جانە نەگىزگى استى قانشالىقتى تولىق ىشكەنىنە بايلانىستى.
جاڭعاق: پايدالى مايلار مەن وسىمدىك اقۋىزىنىڭ كوزى
جاڭعاقتىڭ كوپ ءتۇرى اعزاعا پايدالى. ونىڭ قۇرامىندا وسىمدىك اقۋىزى، قانىقپاعان مايلار جانە باسقا دا قۇنارلى زاتتار بار. قۋاتتىلىعى جوعارى بولعاندىقتان، جاڭعاق اعزانىڭ ەنەرگيا قاجەتتىلىگىن تولىقتىرۋعا كومەكتەسەدى. دەگەنمەن كەي ادامدار جاڭعاق جەگەننەن كەيىن وڭەشى مەن اسقازانىندا جايسىزدىق نەمەسە اۋىرسىنۋ سەزىنۋى مۇمكىن. بۇعان جاڭعاق قۇرىلىمىنىڭ قاتتىلىعى سەبەپ. ونى جەتكىلىكتى شايناماي جۇتۋ اس قورىتۋ جولىنا قوسىمشا مەحانيكالىق اسەر ەتۋى ىقتيمال. اسىرەسە گاستريت، ەزوفاگيت نەمەسە اسقازان جاراسى بار ادامداردا جاعىمسىز بەلگىلەر بايقالۋى مۇمكىن.
مۇنداي جايسىزدىقتىڭ الدىن الۋ ءۇشىن جاڭعاقتى اسىقپاي، ابدەن شايناپ جەگەن دۇرىس. ءونىم نەعۇرلىم جاقسى ۇساقتالسا، ونىڭ وڭەش پەن اسقازاننىڭ شىرىشتى قاباتىنا تۇسىرەتىن مەحانيكالىق اسەرى دە سوعۇرلىم ازايادى.
كەپتىرىلگەن جەمىس: پايدالى، ءبىراق مولشەرىن باقىلاعان ءجون
كەپتىرىلگەن جەمىس قۇرامىندا تاعامدىق تالشىقتار، دارۋمەندەر مەن مينەرالدار بار. سوندىقتان ولاردى تاتتىلەر مەن كامپيتتەردىڭ ورنىنا تۇتىنۋعا بولادى.
اسىرەسە قارا ورىكتىڭ كەپتىرىلگەن ءتۇرى - قارا ورىك قاعىنىڭ اس قورىتۋ جۇيەسىنە اسەرى زەرتتەلگەن. كلينيكالىق زەرتتەۋلەرگە جاسالعان جۇيەلى شولۋدا ونى تۇتىنۋ ىشەك جۇمىسىنىڭ جاقسارۋىنا ىقپال ەتۋى مۇمكىن ەكەنى كورسەتىلگەن.
الايدا كەپتىرىلگەن جەمىستەردىڭ ءبىر ەرەكشەلىگىن ەسكەرگەن ءجون. كەپتىرۋ كەزىندە جەمىستىڭ قۇرامىنداعى سۋ ازايادى دا، ونداعى قانت پەن قورەكتىك زاتتاردىڭ مولشەرى سالماعىنا شاققاندا قويۋلانا تۇسەدى. سول سەبەپتى از عانا كەپتىرىلگەن جەمىستىڭ قۋاتتىلىعى ءدال سونداي سالماقتاعى جاس جەمىسكە قاراعاندا جوعارى بولۋى مۇمكىن.
بۇل كەپتىرىلگەن جەمىستەر زيان دەگەن ءسوز ەمەس. ءبىراق سالماعىن باقىلاپ جۇرگەن ادامدار ولاردىڭ مولشەرىنە نازار اۋدارعانى ءجون. اسىرەسە قاپتامادان تىكەلەي جەي بەرسەڭىز، قانشا جەگەنىڭىزدى بايقاماي قالۋىڭىز مۇمكىن.
الما: الىپ جۇرۋگە ىڭعايلى ءارى جەڭىل تىسكەباسار
كوپشىلىك تىسكەباسار رەتىندە المانى تاڭدايدى. ونىڭ باستى ارتىقشىلىعى - ۇزاق ۋاقىت بالعىن قالپىن ساقتاپ قالۋى جانە ەرەكشە جاعدايدى قاجەت ەتپەۋى. المانى جۇمىسقا، وقۋعا نەمەسە جولعا وزىڭىزبەن بىرگە الىپ ءجۇرۋ وڭاي. توڭازىتقىش جوق جەردە دە ونى ءبىراز ۋاقىت ساقتاۋعا بولادى.
الما تاعامدىق تالشىقتارعا باي. ولار ىشەكتەگى پايدالى ميكرواعزالاردىڭ تىرشىلىگىن قولداۋعا كومەكتەسەدى. سونىمەن قاتار المانىڭ قۇرامىندا فلاۆونويدتار، س دارۋمەنى جانە باسقا دا پايدالى قوسىلىستار بار.
المانىڭ قۋاتتىلىعى جاڭعاق پەن كەپتىرىلگەن جەمىستەرگە قاراعاندا تومەن. سوندىقتان ونى مولشەرمەن تۇتىنۋ كۇندەلىكتى ەنەرگيا مولشەرىن باقىلاۋعا كومەكتەسەدى. تۇتاس جەمىستەردىڭ قۇرامىنداعى تالشىقتار توقتىق سەزىمىن ساقتاۋعا دا ىقپال ەتەدى.
قايسىسىن تاڭداعان دۇرىس؟
ءار ءونىمنىڭ وزىندىك ارتىقشىلىعى بار:
جاڭعاق - قانىقپاعان مايلار مەن وسىمدىك اقۋىزىنىڭ كوزى. قارىندى جاقسى تويدىرادى، ءبىراق قۋاتتىلىعى جوعارى بولعاندىقتان، مولشەرىن ەسكەرگەن ءجون.
كەپتىرىلگەن جەمىستەر - تاعامدىق تالشىقتار مەن ءتۇرلى قورەكتىك زاتتارعا باي. الايدا قۇرامىنداعى قانت پەن قۋات مولشەرى جوعارى، سوندىقتان ازداپ جەگەن دۇرىس.
الما - تاعامدىق تالشىقتارعا باي، قۋاتتىلىعى سالىستىرمالى تۇردە تومەن ءارى الىپ جۇرۋگە ىڭعايلى جەمىس.
بۇل ونىمدەردىڭ بىرەۋىن عانا تاڭداۋ مىندەتتى ەمەس. ماسەلەن، المانى ازداعان جاڭعاقپەن بىرگە جەسەڭىز، تاعامدىق تالشىقتارمەن قاتار پايدالى مايلار مەن وسىمدىك اقۋىزىن دا الاسىز. دەگەنمەن مۇنداي ۇيلەسىمدە دە پورتسيا كولەمىن ەستەن شىعارماعان ءجون.
جاڭعاق، كەپتىرىلگەن جەمىستەر مەن الما - دۇرىس ءارى تەڭگەرىمدى تاماقتانۋ تارتىبىنە ەنگىزۋگە بولاتىن پايدالى ونىمدەر. ولاردىڭ اعزاعا پايداسى قۇرامىنا عانا ەمەس، قانشا مولشەردە تۇتىنىلاتىنىنا، ادامنىڭ جەكە ەرەكشەلىگىنە جانە كۇندەلىكتى اس مازىرىندەگى ورنىنا دا بايلانىستى.