اياگۇل ميرازوۆا: قاي زاماندا قازاقتىڭ قىزى قارا جامىلىپ، بۇركەنىپ ەدى

قوعامدا داۋ تۋدىرعان ماسەلەنىڭ ءبىرى وقۋشىلار اراسىندا ورامال تارتىپ، ءبىلىم وشاعىنا مەكتەپ فورماسىمەن ەمەس، حيدجاب كيىپ كەلۋدى قۇپ كورەتىندەردىڭ ارەكەتى بولىپ وتىر.

قازاقستاننىڭ ەڭبەك ەرى، بىلىكتى پەداگوگ اياگۇل ميرازوۆادان ابىڭ-كۇبىڭ اڭگىمە تۋعىزعان، قوعامدىق پىكىردى داي-داي قىلىپ قاق جارعان ورامال مەن حيدجاب ماسەلەسىنە قاتىستى پىكىرىن سۇرادىق.

پەداگوگتىڭ پىكىرىن قازاقپارات «egemen Qazaqstan» باسىلىمىنا سىلتەمە جاساپ حابارلايدى.

«ءبىلىم سالاسىندا بايىرعىدان كەلە جاتقان، ۇلگى الارلىق، ونەگە بولارلىق مەكتەپتىڭ كيىم ۇلگىسى بار. تاۋەلسىز ەل اتانعانعا دەيىن دە وقۋشى اتانعان جاستار ارنايى مەكتەپ فورماسىن كيدى. سودان وقۋشىلار ءبىلىمسىز، تاربيەسىز، ءتىپتى ءدىنسىز بولدى دەي الامىز با؟ ولاردىڭ يمانىنىڭ السىرەۋىنە، ءبىلىمىنىڭ تومەندەۋىنە مەكتەپ فورماسى اسەر ەتتى دەۋ قيسىندى ما؟ ارينە جوق! ساپالى ءبىلىم الدى، ونەگەلى تاربيەمەن ەسەيدى مەكتەپ قابىرعاسىندا ولار. ءالى دە سولاي. ءبىرىڭعاي فورما نە ءۇشىن قاجەت؟ باي مەن باعلاننىڭ بالاسى دا، قاراپايىم وتباسىنىڭ وقۋشىسى دا ءبىرىڭعاي كيىم ۇلگىسىمەن جۇرەدى. اتا- انا دا باسەكەلەستىك دەپ باس اۋىرتپايدى، بالانىڭ دا كوڭىلى بۇزىلمايدى الەۋمەتتىك تەڭسىزدىكتى ويلاپ. ونسىز دا ءتۇرلى رەفورمانى باستان وتكەرىپ، الاعاي دا بۇلاعاي باعدارلامالارعا مالتىعىپ قالعان مەكتەپتە ەندى كيىم ۇلگىسىن رەتكە كەلتىردىك پە دەگەندە حيدجاب، ورامال ماسەلەسى دۇركىن-دۇركىن كوتەرىلىپ جاتىر. قاي زاماندا قازاقتىڭ قىزى قارا جامىلىپ، تارس بۇركەنىپ ەدى؟ اتا-بابامىز يسلام ءدىنىن ۇستانبادى ما؟ بەس ۋاقىت نامازىن قازا قىلماي وتەمەدى مە؟ ولار قاي قىزىنا حيدجاب كيگىزىپ، تۇمشالادى؟ قازاق قان جۇتقان قايعىنىڭ ورتاسىندا دا قارا ءتۇستى كيىم كيمەگەن. اق ورامالدى قىزى جات جۇرتتىق اتانىپ، وزگە ءۇيدىڭ بوساعاسىنان كەلىن بولىپ وڭ اياعىمەن اتتاعان ساتتەن باستاپ تارتقان.

عۇمىرىمنىڭ ەلۋ جىلعا جۋىق ۋاقىتىن ۇستازدىققا ارنادىم، ءالى دە وسى سالادا ەڭبەك ەتىپ كەلەمىن. كەيىنگى كەزدە جىلت ەتپە جىلتىراققا اۋەستىگىمىز ارتىپ، وزگەنىڭ سالتىنا ىقىلاسىمىز ۇلعايىپ بارا جاتقانداي كورىنەدى. جىل سايىن جاڭا وقۋ جىلى باستالعاننان ورامال مەن حيدجاب داۋى ءورشيدى دە، سوڭعى قوڭىراۋعا دەيىن ۇلاسادى. مەكتەپ - ءبىلىم ءنارىن قۇياتىن ورتا، بالانىڭ كەلەشەكتە قانداي ماماندىق يەسى اتانارىنا باعدار سىلتەيتىن شاڭىراق. زاڭ تالابى بارلىعىنا دا بىردەي ورىندالادى، ءبارى دە سوعان باعىنۋى ءتيىس. بالا كامەلەتتىك جاسقا تولىپ، ءوزى شەشىم قابىلدايتىن كەزەڭگە جەتكەندە ەركى بىلەدى قانداي كيىم كيەتىنىن. سوندىقتان كەز كەلگەن اتا-انا بالاسىن مەكتەپكە ورانىپ كەلۋىن ەمەس، ءبىلىم السىن، وقىسىن، بىلىكتى مامان اتانۋىنا جول اشىلسىن دەپ قاداعالاۋى كەرەك. اتا- انا ءوزىنىڭ ۇستانعان باعىتى، وي-پىكىرى دۇرىس-بۇرىستىعىن ەسكەرمەي بالاسىنا تاڭىپ، ماجبۇرلەپ تەلي بەرۋىنە بولمايدى دەپ سانايمىن. بارلىق بالا بىردەي، ەمىن- ەركىن ويناپ، جادىراپ جايناپ ءجۇرىپ قاتارلاستارى سەكىلدى ءبىلىم الۋعا تولىق قۇقىلى. ءبىلىم سالاسىنداعى تالاپ بىرەۋ عانا بولىپ، سول تالاپتى ورىنداۋعا اتا-انا دا، ۇستاز دا، مەملەكەت تە مىندەتتى بولۋى ءتيىس دەپ ويلايمىن»، دەدى اياگۇل ميرازوۆا.