وتىرىستا حالىقارالىق جانە وڭىرلىك قاۋىپسىزدىكتىڭ وزەكتى ماسەلەلەرى، دوستاستىق اياسىنداعى ىنتىماقتاستىقتى نىعايتۋ مۇمكىندىكتەرى قارالدى.
ايدا بالايەۆا تەرروريزم مەن ەكسترەميزمگە، كيبەرقاۋىپكە جانە حالىقارالىق ەسىرتكى بيزنەسىنە قارسى كۇرەس، سونداي-اق توتەنشە جاعدايلاردىڭ الدىن الۋ سەكىلدى ءبىرقاتار باسىم باعىتقا توقتالدى.
قازاقستان رەسپۋبليكاسى قاۋىپسىزدىك كەڭەسى ءتوراعاسىنىڭ ورىنباسارى قاۋىپ-قاتەر كۇشەيگەن كەزەڭدە اتالعان باعىتتاردا بىرلەسە جۇمىس ىستەۋدىڭ ماڭىزىن اتاپ ءوتتى.
تەرروريستىك جانە وزگە دە زاڭسىز ارەكەتتەرگە جاساندى ينتەللەكتىنى پايدالانۋ قاۋپىنە، سونداي-اق اسا ماڭىزدى ينفراقۇرىلىمدى قورعاۋ مەن ەسىرتكى بيزنەسىنىڭ سيفرلىق ارنالارىنا توسقاۋىل قويۋ ماسەلەلەرىنە ەرەكشە نازار اۋدارىلدى.
تەرروريستىك قاتەرلەردىڭ جاڭا تۇرلەرىنە جانە ەسىرتكى بيزنەسىمەن اينالىساتىن ترانسۇلتتىق قىلمىستىق توپتارعا قارسى كۇرەستە بىرلەسكەن ءىس-قيمىلدى نىعايتۋ جونىندە ءبىرقاتار ناقتى ۇسىنىس ايتىلدى.
پرەزيدەنت قاسىم-جومارت توقايەۆتىڭ كليماتتىق جانە تەحنوگەندىك سيپاتتاعى توتەنشە جاعدايلاردى بولجاۋ جونىندەگى وڭىرلىك ورتالىق قۇرۋ تۋرالى باستاماسىنىڭ ماڭىزى اتاپ ءوتىلدى.
ءىس-شارا اياسىندا ايدا بالايەۆا رەسەي فەدەراتسياسى قاۋىپسىزدىك كەڭەسىنىڭ حاتشىسى سەرگەي شويگۋمەن جانە بەلارۋس رەسپۋبليكاسى قاۋىپسىزدىك كەڭەسىنىڭ مەملەكەتتىك حاتشىسى الەكساندر ۆولفوۆيچپەن كەلىسسوز جۇرگىزدى. تاراپتار وڭىرلىك قاۋىپسىزدىكتىڭ وزەكتى ماسەلەلەرى جونىندە پىكىر الماسىپ، ايماقتاعى سىن-قاتەرلەر مەن قاۋىپتەردى، سونداي-اق بىرلەسە ارەكەت ەتۋ ءىس-شارالارىن تالقىلادى.
سونىمەن قاتار ت م د- عا مۇشە مەملەكەتتەردىڭ قاۋىپسىزدىك كەڭەستەرى وكىلدەرى ماسكەۋدەگى بەلگىسىز جاۋىنگەر بەيىتى جانىنداعى ماڭگىلىك الاۋعا گۇل شوعىن قويۋ راسىمىنە قاتىستى.
ايتا كەتەيىك، بۇعان دەيىن شىمكەنتتە قازاقستان مەن وزبەكستان قاۋىپسىزدىك كەڭەستەرى اپپاراتتارىنىڭ سەگىزىنشى كونسۋلتاتسيالىق كەزدەسۋى وتكەن بولاتىن. وندا تەرروريزم، ەكسترەميزم، كيبەرقىلمىس جانە جاساندى ينتەللەكتىنى پايدالانۋعا بايلانىستى جاڭا قاۋىپ-قاتەرلەر تالقىلاندى.