وڭاي قارسىلاس جوق. باس باپكەر بوكسشىلاردىڭ جەرەبەسىنە قاتىستى ويىن ايتتى

استانا. قازاقپارات - كەشە بوكستان پاريج وليمپياداسىنىڭ جەرەبەسى تارتىلىپ، قازاقستاندىق بوكسشىلاردىڭ العاشقى قارسىلاستارى انىقتالدى. وسى ورايدا ەرلەر قۇراماسىنىڭ باس باپكەرى مىرزاعالي ايتجانوۆ جەرەبە تارتۋ راسىمىنە قاتىستى شاعىن پىكىرىن ايتتى، - دەپ حابارلايدى olympic.kz.

بۇل - وليمپيادا ويىندارى. ءاربىر قارسىلاس ىرىكتەلىپ، ۇلكەن دايىندىقپەن كەلگەن. وڭاي قارسىلاس جوق. سول سەبەپتى، ءاربىر جەكپە- جەك ءبىز ءۇشىن فينالعا پارا-پار. ءبىز ەكىنشى، ءۇشىنشى كەزدەسۋ قيىن بولادى دەپ قاراستىرمايمىز. ءبىر ءبىرىنشى جەكپە-جەكتەن باستاپ تاس ءتۇيىن دايىن شىعامىز، - دەدى باس باپكەر.

بىرنەشە بوكسشىمىز ءبىرىنشى اينالىمنان سۇرىنبەي وتەر بولسا، ءوز سالماقتارىنداعى الەم ۇزدىكتەرىمەن كەزدەسۋى مۇمكىن.

ەستەرىڭىزگە سالا كەتەيىك، پاريج وليمپياداسىنداعى بوكس جەرەبەسى تومەندەگىدەي تارتىلدى:

51 كيلو: ساكەن بيبوسىنوۆ - سامەت كۋمۋش (تۇركيا)
57 كيلو: ماحمۇد سابىرحان - حوسە كيلەس (يسپانيا)
63,5 كيلو: مۇحامەدسابىر بازارباي ۇلى - ويەر يباررەچە كوندە (يسپانيا)
71 كيلو: اسلانبەك شىمبەرگەنوۆ - زياد يشياش (يوردانيا)
80 كيلو: نۇربەك ورالباي - كاللۋم پەتەرس (اۆستراليا)
92 كيلو: ايبەك ورالباي - ولايتان ادام ولاور (نيگەريا)
+92 كيلو: قامشىبەك قوڭقابايەۆ - گادفا دريسسي (يسپانيا)

قازاقستاندىق بوكسشىلار اراسىنان العاش بولىپ شارشى الاڭعا مۇحامەدسابىر بازارباي ۇلى شىعادى. ونىڭ ءبىرىنشى كەزدەسۋى 27 شىلدەگە جوسپارلانعان.