اي-95 تاپشىلىعى بولمايدى، سوندا دا رەسەيدەن يمپورتتى ارتتىرامىز - ۆيتسە-مينيستر

ەنەرگەتيكا ۆيتسە-ءمينيسترى ەرلان اقكەنجەنوۆ اي-95 ماركالى بەنزيننىڭ تاپشىلىعىن بولدىرماۋ ءۇشىن قانداي شارالار قابىلدانىپ جاتقانىن ايتتى، - دەپ حابارلايدى قازاقپارات ءتىلشىسى.

ەنەرگەتيكا مينيسترلىگىندە وتكەن بريفينگىدە ب ا ق وكىلدەرى ۆيتسە-مينيستر ەرلان اقكەنجەنوۆتەن اي-95 ماركالى بەنزيننىڭ تاپشىلىعى قالاي شەشىلەتىنىن سۇرادى.

«بۇگىنگى تاڭدا رەسەي فەدەراتسياسىمەن 40 مىڭ توننا (اي-95 ماركالى - رەد.) بەنزين جەتكىزۋ تۋرالى ينديكاتيۆتى كەلىسىم بار. ءبىز رەسەي فەدەراتسياسى ەنەرگەتيكا مينيسترلىگىنە وسى ينديكاتيۆتى بالانستى 70 مىڭ تونناعا ۇلعايتۋ تۋرالى حات جولدادىق. ياعني، بۇل شامامەن 110 مىڭ توننا بولادى دەگەن ءسوز.

«PETROSUN» كومپانياسىنىڭ قاجەتتى بەنزيندى جەتكىزبەۋى تۋرالى سۇراعىڭىزعا كەلسەك، كەلىسىمشارت رەسەي ەنەرگەتيكا مينيسترلىگىنىڭ ءوتىنىشى بويىنشا ءبىر ايعا شەگەرىلدى. وزدەرىڭىز بىلەسىزدەر، ولاردا اي-95 ماركالى بەنزين مەن ديزەل بويىنشا جاعداي وڭاي بولماي تۇر. رەسەيدىڭ وڭتۇستىك وڭىرلەرىندە تۇتاس ءبىر ايماقتاردا بەنزين مەن ديزەل جوق. ءتىپتى ول وڭىرلەردە ەگىن جيناۋ ناۋقانى ءۇزىلىپ قالۋى مۇمكىن. ءبىز ول ارىپتەستەرىمىزدى تۇسىنەمىز»، - دەپ جاۋاپ بەردى ءمينيستردىڭ ورىنباسارى.

ايتۋىنشا، رەسەيدەن اكەلىنەتىن بەنزين كولەمىن ۇلعايتۋ شاراسى ساقتىق ءۇشىن عانا جاسالىپ وتىر.

(ءبىراق بۇل جەردە اي-95 بەنزينىنىڭ وزىمىزدەگى ءوندىرىسى قازان ايىندا 65 مىڭ توننا كولەمىندە بولاتىنىن ايتۋ كەرەك. جوسپار بويىنشا 80 مىڭ توننا تۇتىنۋىمىز كەرەك. ءبىراق قىركۇيەك ايىنىڭ قالدىقتارىن قوسىپ ەسەپتەسەك، بولجام بويىنشا، قازان ايىن تاپشىلىقسىز وتكىزە الامىز. ەنەرگەتيكا مينيسترلىگىنىڭ بولجامى بويىنشا اي-95 ماركالى بەنزيننىڭ تاپشىلىعى بولماۋ كەرەك»، - دەدى ەرلان اقكەنجەنوۆ.