باس پروكۋراتۋرانىڭ مالىمەتىنشە، 2021 -جىلدان بەرى كۇدىكتىلەردىڭ، ايىپتالۋشىلاردىڭ جانە سوتتالعانداردىڭ قۇقىقتارىن قورعاۋ، ولارعا قاتىستى ازاپتاۋدىڭ جانە باسقا دا قاتىگەز، ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەر مەن جازالاۋ تۇرلەرىنىڭ الدىن الۋ ماقساتىندا جاپپاي بەينەباقىلاۋ جۇيەسى ەنگىزىلدى.
قىلمىستىق-اتقارۋ كودەكسى مەن ادۆوكاتتىق قىزمەت تۋرالى زاڭناماعا سايكەس كۇدىكتى، ايىپتالۋشى جانە سوتتالعان ادامنىڭ ادۆوكاتپەن كەزدەسۋى قۇپيالىلىق قامتاماسىز ەتىلەتىن جاعدايدا وتكىزىلۋى ءتيىس. تەرگەۋ يزولياتورلارىنىڭ ىشكى ءتارتىپ قاعيدالارىندا دا كەزدەسۋ كەزىندە مەكەمە قىزمەتكەرى قورعاۋشى مەن ونىڭ قورعاۋىنداعى ادامدى كورە الاتىنى، ءبىراق ولاردىڭ اڭگىمەسىن ەستي المايتىنى بەلگىلەنگەن.
- ىشكى ىستەر ءمينيسترىنىڭ 26.07.2017 -جىلعى №505-بۇيرىعىمەن بەكىتىلگەن «قىلمىستىق- اتقارۋ جۇيەسى تەرگەۋ يزولياتورلارىنىڭ ىشكى تارتىپتەمە قاعيدالارىنىڭ» 129-بابىندا كەزدەسۋ تەرگەۋ يزولياتورىنىڭ قىزمەتكەرىنە كۇدىكتىنى، ايىپتالۋشىنى، سوتتالۋشىنى جانە قورعاۋشىنى كورۋگە مۇمكىندىك بەرەتىن، ءبىراق سوزدەرى ەستىلمەيتىندەي جاعدايلاردا جۇرگىزىلەدى دەپ ايقىندالعان، - دەپ مالىمدەدى باس پروكۋراتۋرا.
قىلمىستىق-اتقارۋ جۇيەسى مەكەمەلەرىندە ادۆوكاتتارمەن كەزدەسۋلەر كەزىندە بەينەباقىلاۋعا عانا جول بەرىلەدى، ال اۋديوجازبا جۇرگىزىلمەۋى كەرەك. الايدا №75-مەكەمەگە قاتىستى تەكسەرۋ كەزىندە ناقتى بۇزۋشىلىق انىقتالعان.
- تەكسەرىس بارىسىندا اتالعان مەكەمەنىڭ قىزمەتكەرلەرىمەن وسى جىلدىڭ 8-قىركۇيەگىندە قورعاۋشى ا. جۇمابايەۆ پەن ونىڭ قورعاۋىنداعى كۇدىكتى تۇلعانىڭ كەزدەسۋى مەكەمەنىڭ تەرگەۋ ارەكەتتەرىنە ارنالعان بولمەسىندە (اۋديوجازبا فۋنكتسياسى بار بەينەكامەرا ورناتىلعان) وتكىزىلۋىنە جول بەرىلگەندىگى انىقتالدى. وسىعان بايلانىستى اتىراۋ وبلىسىنىڭ پروكۋراتۋراسى وبلىستىق ق ا ج دەپارتامەنتىنە قاداعالاۋ اكتىسىن ەنگىزدى، - دەپ حابارلادى باس پروكۋراتۋرا.
باس پروكۋراتۋرانىڭ مالىمەتىنشە، ق ا ج مەكەمەلەرىندە ادۆوكاتتىق قۇپيانىڭ ساقتالۋى جۇيەلى تۇردە باقىلانادى. سوڭعى ەكى جىلدا ادۆوكاتتىق قۇپيانىڭ بۇزىلعانى نەمەسە ادۆوكاتتاردىڭ كەزدەسۋلەرىنە زاڭسىز باقىلاۋ جاسالعانى تۋرالى شاعىمدار باس پروكۋراتۋرادا تىركەلمەگەن.
سونىمەن قاتار پروكۋراتۋرانىڭ مالىمەتىنشە، بۇعان دەيىن ق ا ج مەكەمەلەرىندە ادۆوكاتتاردىڭ كەزدەسۋى كەزىندە اۋديوجازبا جۇرگىزۋ فاكتىلەرى انىقتالماعان.
№75-مەكەمەدەگى جاعدايدان كەيىن باس پروكۋراتۋرا 24-قىركۇيەكتە وبلىس پروكۋرورلارىنا ق ا ج مەكەمەلەرىندە ىشكى ءتارتىپ قاعيدالارىنىڭ بارلىق تالابىن ساقتاۋ جونىندە قوسىمشا تاپسىرما بەرگەن.
- باس پروكۋراتۋرانىڭ تاپسىرماسى نەگىزىندە ادۆوكاتتىق قۇپيانى جانە ازاماتتاردىڭ قورعاۋ قۇقىعىن قامتاماسىز ەتۋ ماقساتىندا بارلىق ق ا ج مەكەمەسىندە قوسىمشا تەكسەرىستەر جۇرگىزىلدى. ناتيجەسى بويىنشا زاڭ بۇزۋشىلىقتار انىقتالعان جوق، - دەپ مالىمدەدى قۇزىرلى ورگان.
ەسكە سالايىق، ادۆوكات نۇرلان جولبولوۆ الەۋمەتتىك جەلىدەگى مالىمدەمەسىندە اتىراۋداعى №75-مەكەمەدە ادۆوكاتتاردىڭ قاماۋداعى ازاماتتارمەن كەزدەسۋى كەزىندە اڭگىمەلەردىڭ اۋديوعا جازىلاتىنىن ايتتى. ول بۇل ماسەلەنى ءبىر مەكەمەنىڭ اياسىندا قالدىرماي، ەلدەگى قىلمىستىق-اتقارۋ جۇيەسىنىڭ بارلىق مەكەمەسىنە تەكسەرۋ جۇرگىزۋدى سۇرادى.
ىشكى ىستەر مينيسترلىگىنە قاراستى قىلمىستىق-اتقارۋ جۇيەسى كوميتەتى اتالعان دەرەك بويىنشا № 75-مەكەمەسىندە قىزمەتتىك تەكسەرۋ جۇرگىزىلىپ جاتقانىن مالىمدەدى. ونىڭ اياسىندا ورناتىلعان بەينەباقىلاۋ كامەرالارىنىڭ تەحنيكالىق سيپاتتامالارى مەن ەرەكشەلىكتەرى، سونداي-اق وزگە دە ءمان-جاي زەردەلەنۋ ۇستىندە.
اۆتور
نۇربيبى تەمىرتاسوۆا