كولىك قۇنى كەمىندە 700 مىڭ دوللاردان باستالادى. الايدا ساتىپ الۋشى قوسىمشا جابدىقتار مەن جەكە ديزاين نۇسقالارىن تاڭداسا، باعا بۇدان دا قىمباتتاۋى مۇمكىن.
Nuvolari-دىڭ سىرتقى كەلبەتىن تالعامعا ساي وزگەرتۋگە مۇمكىندىك مول. كولىك شاناعىن بوياۋدىڭ 60 تان استام ءتۇرى ۇسىنىلادى. ونىڭ ىشىندە 50 دەن استام جىلتىر جانە 10 كۇڭگىرت رەڭك بار. سونداي-اق ساتىپ الۋشىلار كاربوننان جاسالعان، سىرتى تولىق اشىق ۇلگىنى جانە تەجەگىش سۋپپورتتارىنا ارنالعان 13 ءتۇستىڭ ءبىرىن تاڭداي الادى.
سالوندى بەزەندىرۋ نۇسقالارى دا از ەمەس. ىشكى ارلەۋگە ارنالعان 30 ءتۇرلى ءتۇس، Audi Exclusive توپتاماسىنداعى ماتەريالدار، ءۇش نەگىزگى بەزەندىرۋ ۇلگىسى جانە 33 ءتۇرلى بىلعارى ۇسىنىلادى. بۇعان قوسا، قاۋىپسىزدىك بەلدىكتەرىنىڭ 12 ءتۇسى مەن اۋىستىرىپ-قوسقىشتاردىڭ ەكى رەڭكىن تاڭداۋعا بولادى.
987 ات كۇشى بار گيبريدتى قوزعالتقىش
Audi Nuvolari- ءدىڭ گيبريدتى كۇشتىك قوندىرعىسى 987 ات كۇشىنە دەيىن قۋات وندىرەدى. جۇيە 789 ات كۇشى بار 4 ليترلىك قوس تۋربينالى V8 قوزعالتقىشىنان جانە ءۇش ەلەكتر موتورىنان تۇرادى. ونىڭ ەكەۋى الدىڭعى وسكە، تاعى ءبىرى ارتقى وسكە ورناتىلعان.
كومپانيا ەسەبىنشە، سۋپەركار ساعاتىنا 100 شاقىرىم جىلدامدىقتى نەبارى 2,6 سەكۋندتا ەڭسەرەدى. ال ەڭ جوعارى جىلدامدىعى ساعاتىنا 350 شاقىرىمنان اسادى. وسى كورسەتكىشتەرى ارقىلى Nuvolari Audi تاريحىنداعى ەڭ قۋاتتى ءارى ەڭ جىلدام سەريالىق اۆتوكولىك اتانباق.
بار بولعانى 499 دانا شىعارىلادى
Audi Nuvolari كولىكتەرىن امەريكالىق تۇتىنۋشىلارعا 2028-جىلدىڭ العاشقى جارتىسىندا جەتكىزۋدى جوسپارلاپ وتىر. كومپانيا بۇل مودەلدىڭ بار بولعانى 499 داناسىن شىعارماق.
ايتا كەتەيىك، بۇعان دەيىن Audi كولىك سالونىنداعى ەكراندار سانىن ازايتىپ، ءداستۇرلى فيزيكالىق باتىرمالاردى قايتا ەنگىزۋ تۋرالى شەشىم قابىلداعان ەدى.
el.kz