اتىستى توقتاتۋ رەجيمى بۇزىلدى، يزرايل يراندى قايتا اتقىلاماق

استانا. KAZINFORM - تەل-اۆيۆ تەگەراندى زىمىران اتتى دەپ ايىپتادى، ال يران بۇل مالىمدەمەلەردى جوققا شىعارىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

يزرايل بيلىگى اتىستى توقتاتۋ تۋرالى كەلىسىمنىڭ بۇزىلۋىنا بايلانىستى يران نىساندارىنا سوققى بەرۋ تۋرالى بۇيرىق شىعاردى. بۇل تۋرالى سەيسەنبى كۇنى تاڭەرتەڭ ەلدىڭ قورعانىس مينيسترلىگى حابارلادى.

يزرايل قورعانىس ارمياسىنىڭ (س ا ح ا ل) مالىمدەمەسىنە سايكەس، اتىستى توقتاتۋ تۋرالى ەكىجاقتى كەلىسىم كۇشىنە ەنگەننەن بىرنەشە ساعات وتكەن سوڭ يران اۋماعىنان يزرايلگە كەمىندە ەكى بالليستيكالىق زىمىران ۇشىرىلعان.

ەكى زىمىراندى اۋە قورعانىس جۇيەسى جويعان. ەشكىم زارداپ شەكپەگەن، قيراعان عيماراتتار جوق.

- يزرايلدىڭ قورعانىس ءمينيسترى يسراەل كاتس تەگەراننىڭ ورتالىعىنداعى يران رەجيمىنىڭ نىساندارىنا جويقىن سوققى بەرۋدى تاپسىردى، - دەلىنگەن مينيسترلىك تاراتقان رەسمي حابارلامادا.

س ا ح ا ل باس شتابىنىڭ باستىعى ەيال زامير اتىستى توقتاتۋ رەجيمى بۇزىلعان جاعدايدا ارميا ارەكەتكە كوشەتىنىن راستادى.

- ءبىز كۇش قولدانامىز، - دەدى ول ارميا باسشىلىعىمەن وتكەن جەدەل كەڭەستە. كەڭەستىڭ مازمۇنىن س ا ح ا ل باسپا ءسوز قىزمەتى جاريا ەتتى.

يزرايلدىڭ سولتۇستىگىندە اۋە دابىلى ىسكە قوسىلدى، بيلىك تۇرعىندارعا ارنايى نۇسقاۋ كەلمەيىنشە، قاۋىپسىز جەردە بولۋعا كەڭەس بەردى.

سونىمەن قاتار، يراننىڭ مەملەكەتتىك اقپارات قۇرالدارى — ISNA اگەنتتىگى مەن IRIB تەلەراديوكورپوراتسياسى يزرايلگە زىمىران جىبەرىلگەنىن جوققا شىعارىپ، تەل- اۆيۆتىڭ ايىپتاۋلارىن «نەگىزسىز» دەپ اتادى.

ەسكە سالايىق، وسى وقيعاعا دەيىن ءبىر تاۋلىكتەن از ۋاقىت بۇرىن يزرايل ا ق ش  ۇسىنعان اتىستى توقتاتۋ كەلىسىمىنە رەسمي تۇردە كەلىسكەنىن راستاعان بولاتىن. ەل بيلىگى «قايسار ارىستان» وپەراتسياسى اياسىندا يادرولىق جانە زىمىراندىق قاۋىپتەردىڭ جويىلعانىن مالىمدەگەن ەدى.

سونىمەن قاتار، س ا ح ا ل- دىڭ حابارلاۋىنشا، اتىستى توقتاتۋ رەجيمى كۇشىنە ەنبەي تۇرىپ، سەيسەنبى كۇنى تاڭەرتەڭ يران اۋماعىنان يزرايل باعىتىنا شامامەن 20 بالليستيكالىق زىمىران اتىلعان.

ولاردىڭ ءبىرى بەەر- شيەۆا قالاسىنداعى تۇرعىن ۇيگە ءتۇسىپ، ءتورت ادام مەرت بولعان.

ايتا كەتەيىك، ا ق ش پرەزيدەنتى دونالد ترامپ يزرايل مەن يران اراسىنداعى اتىستىڭ تولىق توقتاعانىن جاريالاعان بولاتىن.

ال يران يزرايلمەن اتىستى توقتاتۋ رەجيمى كۇشىنە ەنگەنىن مالىمدەدى.