اتىراۋلىق جىگىت «تانكپەن» كوشەدەگى ارام ءشوپتى شاۋىپ ءجۇر
اتىراۋ. KAZINFORM - اتىراۋلىق جىگىت «تانكپەن» كوشەدەگى ارام ءشوپتى شاۋىپ ءجۇر. بۇل تەحنيكا 15-20 ادامنىڭ جۇمىسىن اتقارادى.
تەحنيكا اسكەري تانك ۇلگىسىندە جاسالعان. اتىراۋ قالاسىنىڭ تۇرعىنى باعىتجان دوسانوۆتا قىتايدا شىعارىلعان تەحنيكانىڭ ەكەۋى بار.
«جەكە كاسىپپەن اينالىسىپ ءجۇرمىن. بيىل اتىراۋ قالاسىنىڭ ماڭىنداعى كەڭوزەك جانە العاباس ەلدى مەكەنىندەگى كوشەدە وسكەن ارام ءشوپتى شابۋ كونكۋرسىنا قاتىسقان ەدىم. بۇل ءىستى اتقارۋ ءۇشىن بىرنەشە ادامدى جۇمىسقا تارتتىم. جۇمىسشىلار ارام ءشوپتى «تريممەر» اپپاراتىمەن شاپتى. اپتاپ ىستىقتا ارام ءشوپتى شابۋ وڭاي ەمەس. وعان تۇراقتى ىستەيتىن جۇمىسشىلاردى تابۋ دا قيىن. وسىنداي سەبەپپەن، ينتەرنەتتەن ءشوپ شاباتىن تەحنيكانى ىزدەستىردىم. سونداي ەكى تەحنيكانى قىتايعا بارىپ، ساتىپ الىپ كەلدىم»، - دەيدى باعىتجان دوسانوۆ.
ونىڭ ايتۋىنا قاراعاندا، «تانكتە» 200 اتتىڭ كۇشى بار. ال، سالماعى - 400 كەلى.
«بۇل تەحنيكامەن كەز كەلگەن ءشوپتى شابۋعا بولادى. پۋلتپەن باسقارىلادى. سول سەبەپتەن، 50-60 مەتر قاشىقتان باسقارۋ مۇمكىندىگى بار. شىنجىر تاباندى تەحنيكا جول تالعامايدى. سۋ ايدىندارىنىڭ جاعاسىنان دا، باتپاقتى جەردەن دە ءشوپ شابۋعا بولادى. بارلىق پروتسەس پۋلتپەن رەتتەلەدى»، - دەيدى باعىتجان دوسانوۆ.
ءبىر ەرەكشەلىگى، «تانك» شابىلعان ءشوپتى ۋاتىپ جىبەرەدى. ال، جاياۋ ادامعا ارنالعان جولدىڭ قارىن كۇرەۋگە بولادى.
«ءشوپ شاپقاندا، نە قار كۇرەگەندە بەنزين قولدانامىز. ءبىر كوشەدەن ەكىنشىسىنە جەتكىزۋ ءۇشىن اككۋمۋلياتورمەن جۇرەدى. الداعى جۇمىس اۋقىمى كوبەيسە، تاعى وسىنداي تەحنيكا ساتىپ اكەلەمىن»، - دەيدى باعىتجان دوسانوۆ.
ەسكە سالا كەتەلىك، بۇعان دەيىن اتىراۋدىڭ ماڭىنان دەندرولوگيالىق پارك سالۋعا 20 گەكتار جەر تەلىمى بولىنگەنىن حابارلاعان ەدىك.