اتىراۋدىڭ ماڭىندا اققۋ مەن ۇيرەك، قارعا ءولىپ جاتىر

اتىراۋ. KAZINFORM - اتىراۋ قالاسىنىڭ ماڭىندا اققۋ مەن ۇيرەك، قارعا ءولىپ جاتىر. قاناتتىلاردىڭ نەدەن ولگەنى ازىرگە بەلگىسىز بولىپ وتىر.

بۇل تۋرالى الەۋمەتتىك جەلىدە ۆيدەو تارادى. ۆيدەودا مۇنايلى شاھارداعى ەليەۆاتور ماڭىنداعى اعىندى سۋ قۇيىلۋى مۇمكىن تۇستا قۇستاردىڭ ولەكسەسى تۇسىرىلگەن.

«ەكولوگيالىق توتەنشە وقيعا ما؟ 20-شىلدەدە اتىراۋ قالاسىنىڭ اعىندى سۋلارى مەن اتىراۋ مۇناي وڭدەۋ زاۋىتىنىڭ قالدىقتارى اعىزىلاتىن ەليەۆاتوردىڭ ارتىنداعى «تۋحلايا بالكا» - قۇستار كوپ بولاتىن جەر. ال مىناۋ ءولىپ جاتقان اققۋ، ۇيرەك، قارعانىڭ بالاپاندارى جالعىز ءجۇزىپ ءجۇر... ەكولوگتاردان «نە بولدى، نە بولىپ جاتىر؟» دەپ سۇرايىن دەگەنىم... ولار جاۋاپ بەرە مە ەكەن؟ تانىس اڭشىلار «بۇل جەردە قانداي دا ءبىر جەرگىلىكتى درەناج نەمەسە قوقىس تاستالعان» دەپ ەسەپتەيدى»، - دەپ حابارلادى ۆيدەو اۆتورى ۆيكتور سۋتياگين.

ازىرگە رەسمي ورگاندار بۇل دەرەككە بايلانىستى پىكىر بىلدىرگەن جوق.

ەسكە سالا كەتەلىك، بۇدان بۇرىن اتىراۋدا جايىق وزەنىنىڭ جاعالاۋىنان 160 توننا توپىراق سالىنعان قاپ جينالعانىن حابارلاعان بولاتىنبىز.

اۆتور
جولداسبەك شوپەعۇل