اتىراۋداعى مەكتەپتە وقۋشىلار ساباققا ۇلتتىق كيىممەن بارىپ ءجۇر

استانا. قازاقپارات - اتىراۋداعى مەكتەپتەردىڭ بىرىندە باستاۋىش سىنىپ وقۋشىلارى مەن مۇعالىمدەر مەكتەپكە ۇلتتىق كيىممەن كەلەدى.

دۇيسەنعالي بايبوسىنوۆ اتىنداعى №13 مەكتەپ- گيمنازيانىڭ 500-دەن اسا وقۋشىسى ۇلتتىق كيىم كيۋدى قازىر داستۇرگە اينالدىرعان. اتا-انالاردىڭ ۇسىنىسىمەن قولعا الىنعان يگى باستاماعا قازىر جوعارعى سىنىپ وقۋشىلارى دا قىزىعۋشىلىق تانىتىپ ءجۇر.

قازاقى ويۋ- ورنەكپەن كومكەرىلگەن كەۋدەشە، كاجەكەي، تاقيا. بۇل №13 مەكتەپ-گيمنازيانىڭ باستاۋىش سىنىبىندا وقيتىن وقۋشىلاردىڭ كۇن سايىن ۇمىتپاي كيەتىن ۇلتتىق كيىمى. كورگەن ادامنىڭ كوزى توياتىن ۇلتتىق ناقىشتاعى كيىمدەردى كيۋ باستاماسىن اتا-انالار كوتەرگەن. مەكتەپ مۇعالىمدەرى دە ۇسىنىستى قولداپ، قازىر وزدەرى دە ۇلتتىق كيىم كيۋدى ادەتكە اينالدىردى.

ايمانگۇل حامزينا، باستاۋىش سىنىپ مۇعالىمى:

- ءبىلىم سالاسىندا جالپى بىلىممەن بىرگە تاربيە قاتار جۇرەدى. تاربيە مەن ءبىلىم ەگىز، دەيمىز. سوندىقتان قازىرگى كەزدە ءبىزدىڭ وقۋشىلارىمىزدىڭ سىرتقى كيىمدەرىنە ۇلكەن ءمان بەرىلەدى. بۇل كيىمدەردى تىگۋ كەزىندە، ويۋلى كيىمدەردى تاڭداۋ كەزىندە بىزگە ۇلكەن كومەك كورسەتىپ وتىرعان - اتا-انالار. ءوز وتانىن سۇيەتىن، جاقسى ادەپتى، تاربيەلى، قازاقى وقۋشىلارىمىزدى تاربيەلەگىمىز كەلەدى.

1000-عا جۋىق وقۋشىسى بار ءبىلىم ورداسىنداعى بالالاردىڭ جارتىسىنان كوبى قازىر ۇلتتىق كيىممەن ساباققا كەلەدى. بۇگىندە جوعارعى سىنىپ وقۋشىلارى دا بۇل باستاماعا قىزىعۋشىلىق تانىتىپ ءجۇر.

الماس قابدەشوۆ، د. بايبوسىنوۆ اتىنداعى №13 مەكتەپ-گيمنازيا ديرەكتورىنىڭ ورىنباسارى:

- باستاۋىش سىنىپ وقۋشىلارى مەكتەپ فورماسىمەن قوسا كۇندەلىكتى ۇلتتىق ناقىشتا تىكتىرىلگەن، ادەمى قازاقى ويۋلارمەن تىكتىرىلگەن جاكەتتەرىن كيىپ ءجۇر. مۇنداعى ماقسات وقۋشىلاردىڭ بويىندا ۇلتتىق قۇندىلىقتاردى قالىپتاستىرۋ. قازىرگى تاڭدا 500 وقۋشى باستاۋىش سىنىپ وقۋشىلارى جانە ورتا بۋىننىڭ 100 وقۋشىسى وسى كيىمدى كيىپ ءجۇر.

مۇنداي يگى باستاما وقۋشىلاردىڭ ادەت- عۇرىپ، سالت- داستۇرگە دەگەن قىزىعۋشىلىعىن ەرتە وياتىپ، ولاردىڭ ەلىن سۇيەتىن ازامات بوپ وسۋىنە جول اشادى، دەيدى مەكتەپ باسشىلىعى. ۇلتتىق كيىم كيۋ ءداستۇرىن قازىر باسقا ءبىلىم وشاقتارى دا قولعا الىپ جاتىر.

24.kz