اتىراۋدا ۇيگە تەرەزەدەن كىرىپ، التىن مەن اقشا ۇرلاعان 2 كۇدىكتى ۇستالدى

اتىراۋ. KAZINFORM - اتىراۋدا 2 جىگىت جەكە يەلىكتەگى تۇرعىن ۇيلەرگە تەرەزەدەن كىرىپ، التىن بۇيىمدار مەن اقشا ۇرلاعان. كۇدىكتىلەردىڭ وسىنداي 3 قىلمىسقا قاتىسى بارى انىقتالىپ وتىر. اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، كۇدىكتىلەر ۇرلاعان التىن اشەكەيلەردى لومباردقا تاپسىرعان.

- اتىراۋ قالالىق پوليتسيا باسقارماسىنا قاراستى №2 پوليتسيا ءبولىمى كريمينالدىق پوليتسيا بولىمشەسىنىڭ قىزمەتكەرلەرى بىرنەشە تۇرعىن ءۇيدىڭ پلاستيكالىق تەرەزەدەن اشىپ، باعالى زاتتاردى، التىن بۇيىمدار مەن ءارتۇرلى كۋپيۋراداعى اقشانى ۇرلاعان ەكى كۇدىكتىنى ۇستادى. تەكسەرۋ بارىسىندا كۇدىكتىلەر ۇرلاعان التىن بۇيىمداردى اتىراۋ قالاسىنىڭ اۋماعىندا ورنالاسقان لومباردقا تاپسىرعانى بەلگىلى بولدى. كۇدىكتىلەردىڭ وسىعان ۇقساس 3 قىلمىسقا قاتىسى بارى انىقتالدى، - دەپ حابارلادى دەپارتامەنتتىڭ باسپا ءسوز قىزمەتى.

ءقازىر ەكى كۇدىكتىگە قاتىستى سوتقا دەيىنگى تەرگەپ- تەكسەرۋ باستالدى.

- وزگە اقپارات ق ر قىلمىستىق- پروتسەستىك كودەكسىنىڭ 201-بابىنا سايكەس جاريالاۋعا جاتپايدى. ق ر كونستيتۋتسياسىنىڭ 77-بابى 3-تارماعىنىڭ 1-تارماقشاسى، ق ر قىلمىستىق- پروتسەستىك كودەكسىنىڭ 19-بابىنىڭ 1-بولىگىنە سايكەس ادامنىڭ كىنالى ەكەندىگى زاڭدى كۇشىنە ەنگەن سوت ۇكىمىمەن تانىلعانشا جاساعان قىلمىسقا كىنالى ەمەس دەپ ەسەپتەلەدى، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.

ەسكە سالا كەتەلىك، بۇدان بۇرىن اتىراۋدا 46 جاستاعى ايەلدى ولتىرگەن كۇدىكتى قاماۋعا الىنعانىن جازعان ەدىك.