اتىراۋدا سپورت باسقارماسىنىڭ بۇرىنعى باسشىسى 4، جاتتىقتىرۋشى 3 جىلعا سوتتالدى
اتىراۋ. KAZINFORM - اتىراۋ سوتى وبلىستىق دەنە شىنىقتىرۋ جانە سپورت باسقارماسىنىڭ بۇرىنعى باسشىسى مەن اعا جاتتىقتىرۋشىعا قاتىستى ۇكىم شىعاردى.
سىبايلاس جەمقورلىققا قارسى ءىس- قيمىل اگەنتتىگى باسپا ءسوز قىزمەتىنىڭ مالىمەتىنشە، قىلمىستىق ءىس اتىراۋ قالاسىنداعى № 2 سوتتا قارالعان.
- بيىل 21 -ساۋىردە اتىراۋ قالاسىنىڭ № 2 سوتى وبلىستىق دەنە شىنىقتىرۋ جانە سپورت باسقارماسىنىڭ بۇرىنعى باسشىسى د. كوسپانوۆقا قاتىستى ۇكىم شىعاردى. ول «وليمپيادالىق رەزەرۆتى دايىنداۋ ورتالىعى» ك م م- نىڭ اعا جاتتىقتىرۋشىسى ن. مايلاشيەۆتەن بيۋدجەت قاراجاتى ەسەبىنەن وقۋ-جاتتىعۋ جيىندارىنا شىعۋعا جاردەمدەسكەنى، سونداي- اق ك م م جاتتىقتىرۋشىلارىنان جالپى سوماسى 2,4 ميلليون تەڭگەگە جۋىق اقشا قاراجاتىن زاڭسىز جيناۋ جولىمەن لاۋازىمدىق وكىلەتتىكتەرىن تەرىس پايدالانعانى ءۇشىن 1,7 ميلليون تەڭگە سوماسىندا پارا العان. بۇدان باسقا، باسقارما باسشىسى ك م م- دە ەڭبەك قىزمەتىن ءىس جۇزىندە جۇزەگە اسىرماعان ادامدارعا جالاقىنى زاڭسىز تولەپ، 1,1 ميلليون تەڭگە سوماسىندا بيۋدجەت قاراجاتىن جىمقىرعانى ءۇشىن كىنالى دەپ تانىلدى، - دەپ حابارلادى اگەنتتىكتىڭ باسپا ءسوز قىزمەتى.
سوت ۇكىمىمەن باسقارمانىڭ بۇرىنعى باسشىسى د. قوسپانوۆ 4 جىلعا، اعا جاتتىقتىرۋشى ن. مايلاشيەۆ 3 جىلعا باس بوستاندىعىنان ايىرىلعان. سوتتالعاندار مەملەكەتتىك قىزمەتتە، سۋديادا جانە جەرگىلىكتى ءوزىن- ءوزى باسقارۋ ورگاندارىندا قىزمەت اتقارۋ قۇقىعىنان ءومىر بويى ايىرىلعان.
ەسكە سالا كەتەلىك، بۇعان دەيىن اتىراۋدىڭ ەكس- اكىمى مەن اكىمدىكتىڭ شەنەۋنىكتەرىنە بەرىلگەن جازا وزگەرىسسىز قالعانىن جازعان بولاتىنبىز.
اۆتور
جولداسبەك شوپەعۇل