اتىراۋدا ۇستىنە ەسكەرتكىش قۇلاعان ءبۇلدىرشىننىڭ ولىمىنە كىنالى ادام سوتتالدى

اتىراۋ. KAZINFORM - اتىراۋدا 2024 -جىلعى ماۋسىمدا ۇستىنە ەسكەرتكىش قۇلاعان 7 جاسار قىز اۋرۋحانادا كوز جۇمدى. ال 9 جاسار اعاسىنىڭ قولى سىنعان.

قايعىلى وقيعا بىلتىر ماۋسىم ايىنىڭ سوڭعى ونكۇندىگىندە بولعان. اتىراۋ قالاسىنداعى «جەڭىس» ساياباعىنا سەرۋەندەۋگە كەلگەن ءبىر وتباسىنىڭ ەكى بالاسى قۇلاعان ەسكەرتكىشتىڭ سالدارىنان زارداپ شەككەن.

جەرگىلىكتى پوليتسيا قىزمەتكەرلەرى اتالعان وقيعاعا بايلانىستى قىلمىستىق ءىس قوزعادى. قىلمىستىق ءىس اتىراۋ قالاسىنداعى № 2-سوتتا قارالدى. ەسكەرتكىشتى ورناتقان ب. -عا ق ر قىلمىستىق كودەكسىنىڭ 306-بابىنىڭ 3-بولىگىمەن ايىپ تاعىلعان.

- اكىمدىك اتىراۋ قالاسىنداعى «جەڭىس» ساياباعىندا ۇ و س باتىرلارىنا ارنالعان 14 ءمۇسىن جاساۋ ءۇشىن دەمەۋشىلەر مەن مەردىگەرلەردى تارتقان. ايىپتالۋشى مەردىگەر بولا تۇرا مۇسىندەر جاساۋ كەزىندە قۇرىلىس نورمالارىن بۇزعان. ناتيجەسىندە ءمۇسىننىڭ بىرەۋى ەكى جاس بالا مەن ولاردىڭ اكەسىنىڭ ۇستىنە قۇلاعان، - دەپ حابارلادى سوتتان.

سوت ايىپتالۋشىنىڭ ارەكەتى ق ر قىلمىستىق كودەكسىنىڭ 306-بابىنىڭ 3-بولىگىنەن 279-بابىنىڭ 1-بولىگىمەن (ساۋلەت، قالا قۇرىلىسى جانە قۇرىلىس قىزمەتى سالاسىنداعى قاعيدالاردى نەمەسە نورماتيۆتەردىڭ تالاپتارىن ابايسىزدا ادام ولىمىنە نەمەسە وزگە دە اۋىر زارداپتارعا اكەپ سوققان بۇزۋ) قايتا سارالادى. ال ايىپتالۋشىنىڭ كىناسى كۋاگەرلەردىڭ ايعاقتارىمەن، بەينەجازبالارمەن، ساراپشىنىڭ قورىتىندىسىمەن دالدەنگەن.

پروكۋرور سوتتالۋشىنى 4 جىلعا باس بوستاندىعىنان ايىرۋ تۋرالى ۇسىنىس ءبىلدىردى. الايدا، سوتتالۋشى كىناسىن مويىندامادى. ال جابىرلەنۋشىلەر قاتاڭ جازا تاعايىنداۋدى سۇرادى.

- سوت ۇكىمىمەن ب. ەسىمدى ازامات ق ر قىلمىستىق كودەكسىنىڭ 279-بابىنىڭ 1-بولىگىمەن كىنالى دەپ تانىلدى. وعان ساۋلەت، قالا قۇرىلىسى جانە قۇرىلىس قىزمەتىمەن اينالىسۋ قۇقىعىنان 3 جىل، باس بوستاندىعىن 3 جىل مەرزىمگە ايىرۋ جازاسى تاعايىندالدى. راقىمشىلىق جاساۋ اكتىسى نەگىزىندە 1 جىل 6 اي مەرزىمگە باس بوستاندىعىنان ايىرۋ تۇرىندەگى تۇپكىلىكتى جازا بەلگىلەندى. سوتتالۋشىدان ءاربىر جابىرلەنۋشىنىڭ پايداسىنا مورالدىق زياننىڭ وتەماقىسى رەتىندە 10 ميلليون تەڭگەدەن، ەمدەلۋگە جۇمسالعان شىعىندار ءوندىرىپ الىندى، - دەپ ءمالىم ەتتى اتالعان سوتتان.

سوت ۇكىمى زاڭدى كۇشىنە ەنگەن جوق.

اۆتور

جولداسبەك شوپەعۇل