اتىراۋدا قوس ازاماتتىعىن جاسىرعان ەر ادامعا 516 مىڭ تەڭگە ايىپپۇل سالىندى
اتىراۋ. KAZINFORM - اتىراۋدا ەر ادام 1 جىلدان بەرى قوس ازاماتتىعىن جاسىرىپ كەلگەن. وعان 516 مىڭ تەڭگە ايىپپۇل سالىندى.
اتىراۋ وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جىل باسىنان بەرى قوس ازاماتتىعى بار 17 ادام انىقتالعان.
«سوت شەشىمىمەن 15 ادامعا ايىپپۇل سالىندى. ال، 2 ادام قازاقستان رەسپۋبليكاسىنىڭ اۋماعىنان اكىمشىلىك جولمەن شىعارىلدى. ماسەلەن، قۇرمانعازى اۋدانىنىڭ 47 جاستاعى تۇرعىنى 2002-جىلى العاش رەت قازاقستان ازاماتىنىڭ جەكە باسىن كۋالاندىراتىن قۇجاتتارىن راسىمدەگەن. الايدا، 2023-جىلى رەسەي فەدەراتسياسىنىڭ ازاماتتىعىن قابىلداپ، سول جىلى شىلدە ايىندا سول ەلدىڭ ازاماتتىعىن كۋالاندىراتىن قۇجاتتارىن العان. ەر ادامعا قاتىستى ق ر ازاماتتىق تۋرالى زاڭناماسىن بۇزۋ، ياعني ەل زاڭناماسىندا بەلگىلەنگەن مەرزىمدەردە شەتەل ازاماتتىعىن الۋ فاكتىسىن حابارلاماۋ بويىنشا اكىمشىلىك حاتتاما تولتىرىلدى. ءىس قۇجاتتارى پروتسەسسۋالدىق شەشىم قابىلداۋ ءۇشىن قۇرمانعازى اۋداندىق سوتىنا جولداندى. سوت شەشىمىمەن قوس ازاماتتاعى بار ەر ادام كىنالى دەپ تانىلدى. وعان 140 ايلىق ەسەپتىك كورسەتكىش - 516 مىڭ 880 تەڭگە كولەمىندە ايىپپۇل سالىندى. ايىپپۇل مەملەكەت پايداسىنا ءوندىرىلدى»، - دەپ حابارلادى دەپارتامەنتتىڭ باسپا ءسوز قىزمەتى.
اتالعان دەرەك نەگىزىندە 47 جاستاعى ەر ادام قازاقستان ازاماتتىعىنان ايىرىلعانى تىركەلدى. سوعان بايلانىستى مالىمەتتەر ءتيىستى اقپاراتتىق جۇيەلەرگە ەنگىزىلدى.
ەسكە سالا كەتەلىك، بۇدان بۇرىن اتىراۋدا قوس ازاماتتىعى بار ايەلگە 500 مىڭ تەڭگە ايىپپۇل سالىنعانىن حابارلاعان ەدىك.