اتىراۋ وبلىستىق پوليسيا دەپارتامەنتى باسپا ءسوز قىزمەتىنىڭ مالىمەتىنشە، جول- كولىك وقيعاسى كەشە، 19- قاڭتاردا تۇنگى ساعات 23:30 شاماسىندا تىركەلگەن.
- اتىراۋ قالاسىنان دامبى اۋىلىنا قاتىنايتىن تاس جولدا ۆاز - 2170 جانە Toyota Camry اۆتوكولىكتەرى سوقتىعىستى. جول اپاتىنىنىڭ سالدارىنان 2007 - جىلعى بوزبالا جۇگىزگەن ۆاز - 2170 اۆتوكولىگىندە وتىرعان 16 جاسار جاس ءوسپىرىم وقيعا ورنىندا قايتىس بولدى. اتالعان كولىكتەگى تاعى ءبىر جولاۋشى مەن جۇرگىزۋشىسى اۋرۋحاناعا جەتكىزىلدى، - دەپ حابارلادى دەپارتامەنتتىڭ باسپا ءسوز قىزمەتى.
قازىر اتالعان جول-كولىك وقيعاسىنا بايلانىستى كەشەندى تەرگەۋ امالدارى باستالدى.
- اتا-انالارعا جاس ءوسپىرىمدەردىڭ كولىك جۇرگىزۋىنە جانە تۇنگى مەزگىلدە باقىلاۋسىز جىبەرمەۋدى ەسكەرتەمىز. بالالاردىڭ قاۋىپسىزدىگىن باستى نازاردا ۇستاعان ءجون، - دەپ ءمالىم ەتتى دەپارتامەنتتىڭ باسپا ءسوز قىزمەتىنەن.