اتىراۋدا ەڭبەك ينسپەكتسياسىنىڭ ءبولىم باسشىسى ەكى كىسى ءولىمىن جاسىرماق بولعان

 استانا. KAZINFORM -ءبولىم باسشىسى جۇمىس ورنىندا قايتىس بولعان ەكى ادامنىڭ ولىمىنە قاتىستى ءىستى توقتاتۋعا بايلانىستى پارا بەرۋگە يتەرمەلەگەن.

بۇل تۋرالى سىبايلاس جەمقورلىققا قارسى ءىس- قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.

«اتىراۋ قالاسىنىڭ №2 سوتىمەن وبلىستىق مەملەكەتتىك ەڭبەك ينسپەكتسياسى باسقارماسىنىڭ ءبولىم باسشىسى س. دجاباسوۆقا قاتىستى ۇكىم جاريالاندى. ول كاسىپكەردىڭ اقشاسىن الاياقتىق جولمەن جىمقىرۋعا وقتالعانى جانە وندىرىستە ەكى قىزمەتكەردىڭ قايتىس بولۋى فاكتىسى بويىنشا وعان قاتىستى قىلمىستىق ءىستى توقتاتۋعا بايلانىستى لاۋازىمدى ادامدارعا پارا بەرۋگە يتەرمەلەگەنى ءۇشىن سوتتالدى»، - دەدى دانيار بيگايداروۆ ۆەدومستۆودا وتكەن باسپا ءسوز ءماسليحاتىندا.

سونداي- اق، ءبولىم باسشىسى مەملەكەتتىك سالادا لاۋازىمدى قىزمەت ەتۋ قۇقىعىنان جانە 4 جىلعا باس بوستاندىعىنان ايىرىلدى.

ايتا كەتسەك، انتيكوردىڭ مالىمەتىنشە، سوڭعى ءۇش جىلدا الاياقتىق فاكتىلەرى بويىنشا 770 قىلمىستىق ءىس قوزعالعان، ونىڭ 122 ءىس پارا بەرۋگە يتەرمەلەۋ ساناتىنا جاتادى. رەسپۋبليكا بويىنشا الاياقتارعا الدانىپ بەرىلگەن قاراجاتتىڭ جالپى سوماسى 18,9 ميلليارد تەڭگەدەن اسىپ تۇسەدى.